У дзяржаўнае выданне "Савецкая Беларусь" па ўказанні прэзідэнта Беларусі Аляксандра Лукашэнкі былі перададзеныя да публікацыі рассакрэчаныя дакументы беларускіх спецслужбаў аб падзеях 19 снежня. У дадзеных дакументах прыводзіцца інфармацыя аб замежным фінансаванні беларускай апазіцыі, у прыватнасці, былых кандыдатаў у прэзідэнты.
Кіраўнік дзяржавы даў указанне спецслужбам апублікаваць неабходныя дакументы адразу пасля выбараў, 20 снежня. Апублікаваныя дакументы павінны «паказаць падаплёку здарэння, бескампрамісна назваць імёны арганізатараў, натхняльнікаў і ўдзельнікаў беспарадкаў, у тым ліку і замежных, апублікаваць схемы фінансавання дэструктыўных арганізацый».
Так, у апублікаваных дакументах прыводзіцца інфармацыя аб фінансаванні апазіцыйнага інтэрнэт-сайта «Хартыя 97», праз які вялася агітацыйная кампанія экс-кандыдата Андрэя Саннікава, які ў цяперашні час праходзіць абвінавачаным па крымінальнай справе аб арганізацыі і ўдзеле ў масавых беспарадках у Мінску 19 снежня. Паводле апублікаваных дакументаў, фінансавымі пытаннямі апазіцыйнага сайта займаўся журналіст Алег Бябенін, які загінуў 3 верасня.
За некалькі месяцаў дзейнасці сайта, паводле інфармацыі спецслужбаў, Алег Бябенін неаднаразова атрымліваў буйныя сумы з-за мяжы. У прыватнасці, грант на суму 211 тыс. даляраў нібыта яму перадала супрацоўніца «Хэльсінскай групы ЗША» Кэтрын Фітцпатрык. Шэсць тысяч еўра сайт нібыта атрымаў ад Міжнароднага фонду «Фронтлайн», 26,5 тыс. еўра — ад арганізацыі «Альянс лібералаў і дэмакратаў «За Еўропу», 98 тыс. даляраў — ад Нарвежскага Хельсінскага камітэту.
СБ: Раманчук атрымаў з-за мяжы 200 тыс. даляраў на агітацыю
Сярод апублікаваных у «Савецкай Беларусі» дакументаў ёсць таксама вытрымкі з аналітычнай запіскі аб фінансавым становішчы кандыдатаў у прэзідэнты ад апазіцыі. Сярод іншага ў ёй значыцца, што напярэдадні выбарчай кампаніі экс-кандыдат Яраслаў Раманчук на правядзенне лакальных акцый атрымаў каля 150 — 200 тыс. даляраў ад Міжнароднага рэспубліканскага інстытуту, які цесна супрацоўнічае з дзярждэпартаментам ЗША, пасля чаго з’ехаў у Нямеччыну і ЗША для атрымання дадатковага фінансавання.
У іншай аператыўнай зводцы гаворка ідзе аб фінансаванні перадвыбарчай кампаніі экс-кандыдата ў прэзідэнты Уладзіміра Някляева, які з’яўляецца лідарам грамадзянскай кампаніі «Гавары праўду!». Так, у ёй гаворыцца аб тым, што на збор подпісаў у донараў штаб Уладзіміра Някляева планаваў атрымаць каля 400 тыс. даляраў, на агітацыйную кампанію — 600 тыс. даляраў. На медыйнае суправаджэнне кампаніі планавалася выдзеліць 100 тыс. даляраў, на выраб друкаванай прадукцыі — 250 тыс. даляраў.
Асабіста кіраўніку выбарчага штаба экс-кандыдата Андрэю Дзмітрыеву планавалася выдзеліць 150 тыс. даляраў. Каардынатар перадвыбарчага штаба Уладзіміра Някляева Аляксандр Фядута, у сваю чаргу, нібыта прапанаваў вылучыць са свайго пазабюджэтнага фонду 50-100 тыс. даляраў на падрыхтоўку аналітычных дакументаў аб сацыяльна-палітычнай і эканамічнай сітуацыі ў краіне.
СБ: кампанію Някляева фінансаваў МЗС Польшчы
Акрамя таго, у дадзенай зводцы прыводзяцца словы даверанай асобы Уладзіміра Някляева Сяргея Вазняка, які заявіў, што спонсарамі кампаніі «Гавары праўду!» з’яўляліся прадстаўнікі міністэрства замежных справаў Польшчы.
«Няма ніякіх сумневаў, што да падзеяў 19 снежня прыклалі руку перш за ўсё спецслужбы Польшчы і Нямеччыны, якія спланавалі і арганізацыйна аформілі кампанію «Гавары праўду!», якая па задуме павінна была стаць «Новай апазіцыйнай сілай», здольнай змяніць уладу ў краіне. (…) Ужо першапачаткова грамадзянская кампанія «Гавары праўду!», цалкам падпарадкаваная волі замежных «куратараў», — рэзюмуюць журналісты «Савецкай Беларусі».
СБ: апазіцыйнай моладзі на «плошчу» планавалася выдзеліць два мільёны даляраў
Сярод прадстаўленых дакументаў таксама ёсць вытрымкі з аператыўнай зводкі органаў дзяржбяспекі Беларусі. У іх значыцца, што ў ліпені 2010 года кіраўнік штаба Уладзіміра Някляева Андрэй Дзмітрыеў і лідар незарэгістраванай моладзевай арганізацыі «Малады фронт» Зміцер Дашкевіч прынялі ўдзел у сходзе моладзевай групы па арганізацыі «Плошчы». Па інфармацыі спецслужбаў, моладзевыя актывісты планавалі стварыць сумесную арганізацыю, у якую б увайшлі прадстаўнікі «Маладога фронту», «Правага альянсу», Партыі БНФ і Руху «За свабоду». Бюджэт структуры нібыта меркаваўся да двух мільёнаў даляраў. Гэтыя грошы моладзевыя актывісты нібыта павінны былі выдаткаваць на куплю намётаў і інвентара, неабходнага для арганізацыі «Плошчы».
Таксама сярод агучаных аператыўных матэрыялаў ёсць інфармацыя аб экс-кандыдаце ў прэзідэнты Алесем Міхалевічам, якога таксама абвінавацілі ў арганізацыі масавых беспарадкаў у Мінску. Прадстаўлена інфармацыя аб сустрэчах экс-кандыдата з нямецкай журналісткай у Германіі, якая нібыта апынулася прадстаўніком нямецкіх спецслужбаў. «Алесь Міхалевіч распавёў, што фінансаванне Партыі БНФ ажыццяўляецца ў асноўным з ЗША, Германіі і Польшчы. Са словаў Алеся Міхалевіча, асноўная частка грантаў раскрадаецца верхавінай БНФ, не даходзячы да простых членаў партыі», — гаворыцца ў апублікаванай зводцы.
СБ: Някляеў рыхтаваў план палітычнага крызісу ў Беларусі
Акрамя фінансавання апазіцыі ў апублікаваных дакументах таксама гаворыцца аб уяўных планах беларускай апазіцыі ўвесці краіну ў стан палітычнага крызісу. У прыватнасці, прыводзяцца вытрымкі са «Стратэгічнага плана грамадзянскай кампаніі «Гавары праўду!». Першым этапам стратэгіі нібыта было «стварэнне ўмоў для дэлегітымізацыі вынікаў галасавання пры дапамозе «незалежнага» назірання, а таксама шляхам подкупу членаў выбарчых камісій». Другім этапам на шляху да палітычнага крызісу нібыта было «правядзенне масавых пратэстных акцый».
Сярод апублікаваных дакументаў згаданыя таксама і прадстаўнікі СМІ, якія прыехалі ў Беларусь асвятляць прэзідэнцкія выбары. Больш за 400 замежных журналістаў атрымалі акрэдытацыю на працу ў перадвыбарную кампанію, яшчэ 220 прадстаўнікоў замежных СМІ маюць пастаянную акрэдытацыю. Прадстаўнікі дзяржСМІ назвалі сваіх замежных калегаў «зоркамі крызіснага рэпартажу». «Ангажаваная прэса узгоднена прыехала асвятляць чарговую «каляровую рэвалюцыю», хоць быццам бы ніякіх перадумоў да гэтага ў Беларусі не было відаць і заходнія палітыкі гэта публічна прызнавалі», — гаворыцца ў публікацыі «Савецкай Беларусі».
