Прэзідэнт Беларусі Аляксандр Лукашэнка 26 сакавіка падчас уручэння дзяржаўных узнагарод заявіў пра тое, што "ў свеце не засталося такіх месцаў, як Беларусь". "Натуральна, мы разумеем, што быць Белай Руссю і незалежнасць не так проста даюцца. Але мы павінны зрабіць усё, каб захаваць сваю дзяржаву", — сказаў беларускі лідар.
«Усе да кагосьці ужо далучыліся, увайшлі ў склад. Усе дзяржавы — малыя,
сярэднія — скачуць пад нечую дудку. Але Беларусь не будзе гэтага
рабіць», — цытуе Аляксандра Лукашэнку БелТА.
Па словах кіраўніка дзяржавы, гэта «не нейкі выбрык супраць загаду часу». «Проста наш народ заслужыў, каб мець на гэтай планеце свой кавалак зямлі, каб нашы дзеці і ўнукі нас не папракалі за тое, што мы не захавалі і не перадалі ім у спадчыну гэту зямлю — куток, куды яны заўсёды могуць вярнуцца, дзе іх заўсёды будуць чакаць іх сваякі і блізкія», — адзначыў беларускі лідар.
Аляксандр Лукашэнка падкрэсліў, што ўсё, што «сёння робіцца ў Беларусі, накіравана на забеспячэнне бяспекі дзяржавы і захаванне яе суверэнітэту». «Тыя крыкі, якія сёння раздаюцца практычна з усіх бакоў, ды і ў нас ёсць аматары паёрнічаць: ім усё адно з кім мы сябруем — з Захадам ці Ўсходам, усё адно дрэнна, адказ на іх будзе простым: мы жадаем захаваць сваю дзяржаву», — сказаў прэзідэнт Беларусі.
«А шчасце сваё мы шукаем там, дзе да нас звычайна ставяцца, прымаюць, паважаюць і годна плацяць за нашу працу. Я думаю, вы разумееце, пра што ідзе гаворка», — дадаў кіраўнік Беларусі падчас уручэння ўзнагарод.
Лукашэнка працягне «нарошчваць энергетычны патэнцыял Беларусі»
Беларускі лідар адзначыў таксама, што значную групу сярод узнагароджаных складаюць працоўныя і спецыялітсы прадпрыемстваў энергетычнага комплексу.
«Гэта не выпадкова — галіне належыць важная роля ў рэалізацыі ўсіх нашых планаў. Таму ў апошнія гады велізарная ўвага надаецца нарошчванню энергетычнага патэнцыялу, мадэрнізацыі дзейсных і будаўніцтву новых электрастанцый, падвышэнню эфектыўнасці выкарыстання энергарэсурсаў», — сказаў кіраўнік дзяржавы.
Па словах Аляксандра Лукашэнкі, для беларускага грамадства «важны прыклад людзей, якія ўмеюць не толькі думаць сучасна, творча, але і дамагацца важкага выніку, сваімі канкрэтнымі справамі даваць карысць Айчыне».
Акрамя таго, сярод узнагароджаных нямала прадстаўнікоў Узброеных сіл краіны, а таксама спецыялістаў вытворчых аб’яднанняў і канструктарскіх бюро, якія працуюць на абарону. «Іх прафесіяналізм і ўзорнае выкананне сваіх абавязкаў забяспечваюць бяспеку нашай дзяржавы», — падкрэсліў прэзідэнт Беларусі.
Кіраўнік дзяржавы таксама адзначыў, што ў ліку ўзнагароджаных працаўнікі мастацтва, навукі і адукацыі. «Дзякуй за тое значнае і каштоўнае, што вы ствараеце», — звярнуўся да іх Аляксандр Лукашэнка.
У цэлым прэзідэнт Беларусі абвясціў падзякі і ўручыў дзяржаўныя ўзнагароды 47 грамадзянам краіны.