Прэзідэнт Беларусі Аляксандр Лукашэнка ўнёс шэраг змяненняў і дапаўненняў у некаторыя дакументы, звязаныя з беларускім грамадзянствам. Так, у прыватнасці, былі ўнесены ўдакладненні падставаў для адмовы ў разглядзе заяваў аб набыцці грамадзянства. Адпаведны ўказ № 422 кіраўнік дзяржавы падпісаў 13 жніўня.
Як паведамілі ў прэс-службе прэзідэнта, змены дакументаў былі неабходныя для прывядзення іх у адпаведнасць з законам аб прававым становішчы замежных грамадзянаў і асобаў без грамадзянства ў Беларусі, а таксама ўказам аб адміністрацыйных працэдурах адносна замежных грамадзянаў і асобаў без грамадзянства, прынятых у 2010 годзе.
Новы ўказ прадугледжвае адмову ў разглядзе заяў на набыццё грамадзянства, пададзеных асобамі, у якіх ёсць судзімасць за здзяйсненне злачынстваў незалежна ад катэгорыі цяжкасці, і асобамі, якія неаднаразова прыцягваліся да адміністрацыйнай адказнасці на тэрыторыі Беларусі.
Апроч усяго іншага ўказам рэгулююцца пытанні выхаду з беларускага грамадзянства непаўналетніх дзяцей без спынення грамадзянства іх бацькоў у мэтах рэалізацыі канстытуцыйнага права непаўналетніх на змену грамадзянства. Здзейсніць такі выхад можна па заяве бацькоў (адзінага з бацькоў), якое падаецца на імя прэзідэнта Беларусі ў органы ўнутраных спраў або ў органы дыпламатычнай службы.
Акрамя таго, указам вызначаны парадак набыцця, перадачы ў валоданне, уліку, захоўвання, выкарыстання, увозу ў Беларусь і вывазу зброі і боепрыпасаў да яе асобамі без грамадзянства. Таксама ўказам прэзідэнта прадстаўляецца права асобам без грамадзянства праходзіць падрыхтоўку, перападрыхтоўку і павышэнне кваліфікацыі ў Акадэміі кіравання пры прэзідэнце Беларусі, а таксама абараняць дысертацыі.
