Прэзідэнт Беларусі Аляксандр Лукашэнка заявіў, што ў Еўропе нарэшце зразумелі, што ён — "не нахлебнік і не найміт Масквы". Паводле слоў беларускага лідара, еўрапейскія палітыкі цяпер прызнаюць, што прэзідэнт Беларусі з'яўляецца гарантам незалежнасці сваёй краіны. "Лукашэнка сёння — рэальны гарант незалежнасці і суверэнітэту Беларусі не на шкоду нашым суседзям", — падкрэсліў беларускі прэзідэнт.
«Вось, маўляў, Крэмль паставіў Лукашэнку, і ён будзе скакаць пад іх дудку і дзяржаву здасць, і ў склад Расіі ўступіць. Па-першае, я ніколі такой палітыкі не праводзіў, і гэта можна праверыць. Але гэтага ва ўпор не хацелі бачыць у Еўрасаюзе і ў тым ліку ў Літве», — заявіў Аляксандр Лукашэнка ў інтэрв’ю газеце «Літоўскі кур’ер».
Разам з тым, паводле слоў беларускага лідара, трэба «ўспрымаць як дадзенасць» той факт, што беларусы сёння жывуць у незалежнай дзяржаве. «У апошні час, і я гэтым ганаруся, мы пабудавалі сваю беларускую дзяржаву. Яна яшчэ з недахопамі, яе трэба дабудоўваць, шліфаваць, дзесьці, можа, нейкі вугал падрэзаць. Мы ж не без памылак яе будавалі, мы ж будавалі яе наспех. Нам трэба было хутка адбудавацца, каб заняць сваё месца пад гэтым сонцам. Але тое, што ў нас ёсць дзяржава — гэта дадзенасць. Мабыць, не ўсе ў Расіі да гэтага гатовыя», — падкрэсліў прэзідэнт Беларусі.
З нагоды пагаршэння адносін з Расіяй Аляксандр Лукашэнка адзначыў, што Беларусь ніколі не была ініцыятарам дрэнных адносін з «брацкай Расіяй».
Лукашэнка: рашэнне канфлікту Беларусі і Расіі залежыць ад расійскага кіраўніцтва
«Усё залежыць ад тых, хто кіруе сёння Расійскай Федэрацыяй. Вы бачыце, што сёння даходзіць і да прыніжэння, да асабістых абразаў прэзідэнта Беларусі і іншых людзей. Гэта палітыка, я да гэтага прызвычаіўся. Мне ў маім жыцці давялося не адзін раз перакрочваць праз такія бар’еры. І, паверце, сёння народы Беларусі і Расіі настолькі блізкія, што ніякім палітыкам не ўдасца разарваць гэтыя адносіны», — падкрэсліў Аляксандр Лукашэнка.
«Думаць, што з таго, што Лукашэнка з Мядзведзевым (прэзідэнтам Расіі Дзмітрыем Мядзведзевым — Тэлеграф) узялі адзін аднаго за каўнер і трасуць, можна атрымаць нейкую выгаду, не варта. І Мядзведзеў, і Лукашэнка недурныя людзі і, я думаю, выбудаваць гэтыя адносіны. Калі на тое будзе воля Расіі», — дадаў беларускі лідар.
Аляксандр Лукашэнка таксама заявіў, што ўдзел Беларусі ў праграме «Усходняе партнёрства» не накіраваны супраць Расіі. «Тут няма ніякай насцярожанасці ў тым, што гэта супраць Усходу і поўны адрыў ад Расіі і арыентацыя на Захад. Больш за тое, мы прапанавалі, каб у склад «Усходняга партнёрства» была запрошана Расія», — адзначыў прэзідэнт Беларусі.
Лукашэнка: «Усходняе партнёрства» — непрадуманая акцыя
Разам з тым беларускі лідар лічыць праграму «Усходняе партнёрства» «непрадуманай, да канца не пралічанай акцыяй». «Больш за тое, з’явіліся насцярожныя сімптомы. Напрыклад, як раней ад нас патрабавалі пэўных саступак па розных напрамках, так і цяпер нас спрабуюць паставіць у няроўнае становішча», — адзначыў Аляксандр Лукашэнка.
«Нас спрабуюць зноў нахіліць і прапанаваць умовы не такія, як іншым членам «Усходняга партнёрства». На што мы катэгарычна сказалі «не», і ўсе члены «Усходняга партнёрства» як адзін заявілі, што дыскрэдытацыі Беларусі мы не дапусцім, там павінны быць роўныя ўмовы», — заявіў прэзідэнт Беларусі.
Лукашэнка прапанаваў Літве купляць венесуэльскую нафту
Аляксандр Лукашэнка прапанаваў Літве не толькі транспартаваць, але і купляць нафту ў Венесуэлы. «Мы прапанавалі, што, пастаўляючы сабе, мы будзем пастаўляць і вам. Гэта значыць з’яўляецца альтэрнатыва і ў Літвы. Не толькі мы будзем з Расіі атрымліваць вуглевадародную сыравіну, але і з іншых краін. І мы ўзяліся вырашыць гэтую праблему. Пагадзіцеся, выгадны праект», — падкрэсліў лідар беларускай дзяржавы.
Аднак, паводле слоў прэзідэнта Беларусі, Літва прапанавала «не зусім выгадныя ўмовы» для транспартоўкі венесуэльскай нафты ў Беларусь. «Мы пачалі свае перамовы наўпрост — без конкурсаў, без тэндэраў прапанавалі супрацоўніцтва з Літвой. Маючы на ўвазе, што гэта для Літвы будзе карысна. Гэта вялікія паступленні ў бюджэт, гэта развіццё портаў, гэта прыбыткі вашых кампаній і гэтак далей. А ў выніку гэта нармалёвае жыццё для літоўцаў. Але на вялікае наша здзіўленне, пачалі нас зводзіць-разводзіць, абяцаць, а потым адмаўляцца і гэтак далей, і гэтак далей», — заявіў Аляксандр Лукашэнка.
«Калі гэта гандаль, то тады зразумела. Але ў гэтым выпадку торг недарэчны. Таму што ёсць іншыя краіны, якія нам прапануюць умовы», — падкрэсліў прэзідэнт Беларусі.
