Новы пасол Польшчы ў Беларусі Лешак Шарэпка, які прыбыў у Мінск амаль тыдзень таму, яшчэ не можа афіцыйна прыступіць да выканання сваіх абавязкаў, паколькі яго даверчыя граматы пакуль не прынятыя ў адміністрацыі Аляксандра Лукашэнкі. Пра гэта Тэлеграфу паведаміў 25 лютага першы сакратар польскага дыпведамства Павел Марчук.
Паводле яго слоў, пасольства накіравала ўсе неабходныя дакументы ў Адміністрацыю прэзідэнта Беларусі, аднак адказу не атрымала. Дыпламату таксама невядома, калі можна чакаць такога адказу. «Я б таксама хацеў гэта ведаць. Магчыма, праз тыдзень-другі, але дакладна я нічога не магу сказаць. Вы ж ведаеце: аднаму праз тры дні даюць, а другому могуць даць праз тыдзень. Гэта не азначае, што тут нейкія праблемы», — адзначыў Павел Марчук.
Ён таксама паведаміў, што да прыняцця Аляксандрам Лукашэнкам даверчых грамат Лешака Шарэпкі амбасадар не мае намеру даваць інтэрв’ю якім-небудзь СМІ.
Як раней паведамляў Тэлеграф, прыезд новага кіраўніка польскага прадстаўніцтва ў беларускую сталіцу быў запланаваны на пачатак 2011 года, аднак пасол змог прыехаць у Мінск толькі 20 лютага.
