Лукашэнка: мы апратэстуем санкцыі ЕС у судзе

24.06.2011 10:08
Архив

Рэспубліка Беларусь мае намер звярнуцца ў міжнародныя суды з нагоды абмежаванняў, якія ўвёў супраць кіраўніцтва краіны Еўрапейскі саюз. Пра гэта 23 чэрвеня падчас рабочай паездкі ў Берасцейскую вобласць заявіў Аляксандр Лукашэнка. "Гэта бязглуздая, непрадуманая палітыка", - сказаў ён аб дзеяннях Еўрасаюза.

«Я хачу даручыць сваім юрыстам, у нас дастаткова спецыялістаў, — мы павінны гэтую праблему разгледзець юрыдычна праз адпаведныя суды, прад’явіць іскі тым, хто ўводзіў не толькі эканамічныя санкцыі, але і ў дачыненні да журналістаў», — цытуе Аляксандра Лукашэнку БелТА.

На яго думку, супрацоўнікі беларускіх медыя ў сваіх артыкулах выказваюць уласны пункт гледжання і маюць на гэта права. «Якое ты маеш права, дэмакратычная краіна, судзіць журналіста за яго пазіцыю? За што вы сёння асобным журналістам закрылі ўезд у Еўрасаюз?» — заявіў кіраўнік дзяржавы.

Беларускі прэзідэнт таксама выказаўся наконт санкцый, прынятых супраць чыноўнікаў. «Прычым тут людзі, якія працуюць ва ўладзе, але наогул не мелі дачынення да выбараў, тым больш да 19 снежня? Да 19 снежня мелі дачыненне максімум пяць чалавек (прэзідэнт, міністр унутраных спраў і іншыя). Іх і карайце, калі лічыце патрэбным, але прычым тут гэтыя людзі? Якое вы маеце права аб’яўляць неўязнымі суддзяў? Вы ж выступае за незалежны суд», — заўважыў ён.

«Нашым юрыстам трэба сур’ёзна ўзяцца за гэтае пытанне, і хай тлумачацца — тлумачэнняў у іх аб’ектыўных няма. Калі суд адпаведны, куды мы звернемся, не прыме гэтае рашэнне (на карысць Беларусі) — значыць, такі гэта суд на Захадзе. Яны сябе ў гэтым плане загналі ў далёкі кут», — дадаў Аляксандр Лукашэнка.

Лукашэнка: санкцыі ЕС — дробныя блышыныя ўкусы

Эканамічныя абмежаванні, якія Еўрасаюз увёў супраць некаторых беларускіх кампаній, не пагоршаць сітуацыю ў Беларусі, адзначыў кіраўнік дзяржавы. «Гэта дробныя блышыныя ўкусы. Яны ніколі не даюць карысці ні ім, ні нам», — заявіў Аляксандр Лукашэнка.

Паводле яго слоў, Беларусь прыме супраць Еўрасаюза ў адказ эканамічныя меры. «Калі яны нас будуць тузаць з пункту гледжання эканомікі, мы таксама знойдзем чым адказаць. У нас нямала кампаній працуюць тут і ўласнасць маюць, па якіх мы вельмі балюча можам ўдарыць», — удакладніў кіраўнік дзяржавы.

«Я не хачу гэтай эскалацыі, таму на гэта не адказваю, паколькі гэтыя санкцыі сітуацыю ў краіне не пагоршаць. Яны проста паказваюць, які сёння свет і якая дэмакратыя на Захадзе», — заўважыў ён.

Лукашэнка: мяне не фінансуюць кампаніі, што падпалі пад санкцыі

Аляксандр Лукашэнка таксама заявіў, што беларускія арганізацыі, супраць якіх дзейнічаюць санкцыі, не фінансуюць нікога з уладаў краіны.

«Яны (кампаніі) нібыта фінансуюць урад. Дакажыце! Гэта нягоднікі і падонкі. Пакладзеце на стол дакументы, што гэтыя кампаніі фінансавалі хоць каго-небудзь з ўрада — неадкладна мною будуць прыняты меры. Калі гэта мяне тычыцца, я ўжо даўно казаў, знайдзіце гэтыя грошы і забярыце. Калі пакладзеце дакументы, што яны фінансуюць прэзідэнта ці яшчэ кагосьці пры прэзідэнце, імгненна будзе прынята рашэнне», — сказаў ён.

Як ужо перадаваў Тэлеграф, рада міністраў замежных спраў краін Еўрасаюза 20 чэрвеня прыняла рашэнне пашырыць візавыя і эканамічныя санкцыі ў дачыненні да прадстаўнікоў беларускіх уладаў, якіх у ЕС лічаць датычнымі да «палітычных рэпрэсіяў пасля выбараў 19 снежня». Так, «чорны спіс» ЕС папоўніўся чатырма новымі прозвішчамі.

Эканамічныя санкцыі ўведзеныя супраць кампаній «Белтэхэкспарт», «Спорт-пары» і «БТ Тэлекамунікацыі», падкантрольных блізкаму да Аляксандра Лукашэнкі бізнэсмэну Уладзіміру Пефціеву. У ЕС Пефціева лічаць галоўным эканамічным дарадцам беларускага прэзідэнта і «фінансавых спонсарам рэжыму Лукашэнкі».