Дзяржаўнаму камітэту па маёмасці Беларусі далі права прымаць рашэнні аб продажы і паніжэнні пачатковай цаны продажу акцый адкрытых акцыянерных таварыстваў (ААТ), якія належаць дзяржаве і ўключаных у зацвярджаны ўрадам план прыватызацыі. Адпаведны дэкрэт № 11 сакавіка падпісаў прэзідэнт Беларусі Аляксандр Лукашэнка.
Паводле дадзенага дакумента, са згоды Дзяржкаммаёмасці дапускаюцца другая і наступныя эмісіі акцый ААТ, якія не займаюцца перапрацоўкай сельскагаспадарчай прадукцыі і былі створаны шляхам пераўтварэння рэспубліканскіх унітарных прадпрыемстваў.
Пры гэтым агаворваецца, што дадзеныя акцыянерныя таварыствы павінны быць уключаныя ў пералік юрыдычных асоб, якія забяспечваюць функцыянаванне стратэгічна значных галін эканомікі або іншыя важныя дзяржаўныя патрэбы. Гэты спіс зацвярджаецца ўрадам Беларусі па ўзгадненні з кіраўніком дзяржавы. У той жа час другая і наступныя эмісіі акцый ААТ, створаных у працэсе пераўтварэння камунальных унітарных прадпрыемстваў, дапускаюцца са згоды адпаведных мясцовых выканаўчых і распарадчых органаў.
Як растлумачылі ў Адміністрацыі прэзідэнта, надзяленне Дзяржкаммаёмасці падобнымі паўнамоцтвамі дасць магчымасць спрасціць працэдуру продажу дзяржаўных акцый ААТ, істотна скараціць тэрмін яе рэалізацыі і зрабіць яе больш зразумелай для патэнцыйных інвестараў.
Між тым, у мэтах абароны інтарэсаў дзяржавы дэкрэтам прадугледжваецца, што другая і наступныя эмісіі акцый ААТ, якія займаюцца перапрацоўкай сельгаспрадукцыі і былі створаны шляхам прыватызацыі аб’ектаў дзяржуласнасці, павінны праводзіцца па ўзгадненні з прэзідэнтам Беларусі.