Прэзідэнт Беларусі Аляксандр Лукашэнка перакананы ў тым, што краіна цяпер настолькі ўмацавалася, што нікому не ўдасца яе абваліць. "Нікому не дадзена абваліць Беларусь: ні Расіі, ні Украіне, ні Еўрасаюзу, ні Амерыцы. Мы ўжо не тыя, нас штучна валіць немагчыма, калі мы самі сябе не абвалім", — заявіў кіраўнік дзяржавы ў час паездкі па Магілёўскай вобласці.
«Наша шчасце ў нашых руках. Калі мы разам будзем як адзінае цэлае, будзем бачыць краіну, думаць пра дзяцей, мы штосьці зробім. Не будзем, ні адна ўлада нам нічога ў адзіночку не зробіць», — адзначыў Аляксандр Лукашэнка.
«Не трэба казаць, што гэта зрабіў Лукашэнка. Ваша падтрымка выратавала краіну, дзякуючы ёй мы яе стварылі, галоўнае, цяпер яе не страціць», — падкрэсліў кіраўнік дзяржавы.
Лукашэнка раіць прыгледзецца да патэнцыйных кандыдатаў
У сувязі з гэтым, беларускі лідар параіў беларускаму народу ўважліва прыгледзецца да патэнцыйных кандыдатаў у прэзідэнты і іх перадвыбарных праграмаў. Паводле слоў прэзідэнта, менавіта народ павінен «правільна ўсё расставіць і вызначыцца». «Жадаючых паруліць нямала, але вы ўважліва іх разглядайце, глядзіце, што яны зрабілі да гэтага часу», — сказаў Аляксандр Лукашэнка.
У якасці прыкладу кіраўнік дзяржавы прывёў заяву аднаго з прэтэндэнтаў на прэзідэнцкі пост аб тым, што ў выпадку свайго абрання ў першы ж год знаходжання ва ўладзе ён мае намер аддаць Расіі трубаправодныя артэрыі, якія праходзяць па тэрыторыі Беларусі і нафтаперапрацоўчыя заводы. «Калі я гэта чытаю, мне страшна становіцца і крыўдна. Гэта наш здабытак, як яго аддаць?! У каго ты спытаў?» — Сказаў прэзідэнт Беларусі.
Лукашэнка «ідзе ў народ», каб адцягнуцца ад выбараў
Як паведамілі ў Адміністрацыі прэзідэнта, Аляксандр Лукашэнка таксама прызнаўся, што сам ён пакуль аб выбарах не думае. «Шчыра кажучы, аб выбарах нават не думаю. Але ў Мінску рана ці позна цябе тузануць па выбарах. Каб адцягнуцца ад гэтага, еду да людзей, у поле, у вёску, каб пагаварыць з людзьмі. Таму пакуль я не хварэю на гэты перадвыбарны настрой», — заявіў кіраўнік дзяржавы.
«Я і чыноўнікам кажу: гэта не мае выбары. Гэта вашы выбары: вас жа будуць ацэньваць на месцах», — дадаў прэзідэнт. У той жа час, па словах Аляксандра Лукашэнкі, галоўнае цяпер «глядзець наперад». «Пройдуць выбары. Колькі ў нас было гэтых выбараў. Галоўнае — як будзем далей жыць», — лічыць кіраўнік дзяржавы.
