Прэзідэнт Беларусі Аляксандр Лукашэнка даручыў перагледзець парадак фармавання чаргі тых, хто мае патрэбу ў паляпшэнні жыллёвых умоваў у Мінску. Такую задачу кіраўнік дзяржавы паставіў 25 сакавіка падчас даклада Мінгарвыканкама аб перспектывах забудовы Мінску да 2015 года.
У прыватнасці, Аляксандр Лукашэнка лічыць несправядлівым, што сёння ў чарзе знаходзяцца і тыя, хто не мае ніякага жылля, і тыя, хто крыху не дацягвае да нарматыву ў 15 кв. метраў на чалавека, паведамляе БелТА.
Як далажыў Аляксандру Лукашэнку мэр Мінску Мікалай Ладуцька, у цяперашні час на чарзе маючых патрэбу ў паляпшэнні жыллёвых умоваў у сталіцы стаіць каля 280 тыс. чалавек. Пры гэтым каля 60 тыс. з іх не маюць ва ўласнасці ніякага жылля.
«Тут трэба прымаць кардынальнае рашэнне. І гэта пытанні не ўрада, трэба тэрмінова іх перадаць на ўзровень выканкама, каб яны, зыходзячы з уласнага бюджэту, перспектыў, вызначалі, колькі квадратных метраў на брата павінна быць», — сказаў кіраўнік дзяржавы. «Лічу, правільна ці няправільна мы зрабілі, можа, паспяшаліся — 15 метраў, але гэта несправядліва: чалавек стаіць у чарзе сем гадоў і нічога не мае, і чалавек, які жыве і 14, 13 ці 10 квадратных метраў на брата мае. Розніца ж ёсць», — дадаў кіраўнік дзяржавы.
Аляксандр Лукашэнка таксама даручыў абмеркаваць гэтае пытанне з урадам. «Па чарзе трэба вызначыцца, бо мы бясконца будзем мець вялізную чаргу ў Мінску», — падкрэсліў кіраўнік дзяржавы. Пры гэтым ён нагадаў, што такая сітуацыя з ажыятажным попытам на жыллё толькі ў Мінску, у абласных жа цэнтрах гэтую праблему ўдалося зняць.
Лукашэнка незадаволены рэалізацыяй праекту «Мінск-Сіці»
Акрамя таго, кіраўнік дзяржавы выказаў незадаволенасць тэмпамі прасоўвання праекту па будаўніцтве шматфункцыянальнага комплексу «Мінск-Сіці». «Дасягнутыя дамоўленасці павінны няўхільна выконвацца», — заявіў Аляксандр Лукашэнка, паставіўшы пры гэтым пытанне аб перапланіроўцы забудовы «Мінск-Сіці».
Па словах прэзідэнта, «Мінск-Сіці» павінен быць жаданым для людзей, каб людзі туды імкнуліся. «Але хто будзе імкнуцца ў жалезабетон? Трэба зрабіць акуратныя кварталы, прыгожыя, каб ім было зручна там жыць», — сказаў кіраўнік дзяржавы.
Лукашэнка: цэнтр цяжару будаўніцтва жылля трэба пераносіць з Мінску ў рэгіёны
Таксама, па словах кіраўніка дзяржавы, цэнтр цяжару будаўніцтва жылля неабходна пераносіць у рэгіёны, каб выключыць перанасяленне Мінску. «Ва ўсім свеце працоўная сіла едзе да працоўных месцаў, а не наадварот. Мінск не павінен быць перанаселены. Будаваць ў сталіцы трэба толькі кропкава, каб жыхарам было зручна ў горадзе», — сказаў прэзідэнт.
«Усё павінна быць падпарадкавана інтарэсам сталіцы і інтарэсам людзей, якія тут жывуць», — падкрэсліў кіраўнік дзяржавы. — Трэба арыентавацца на тое, што ў Мінску не павінна пражываць больш за 1,8 млн. чалавек. 1,8 млн. чалавек — і не больш, пакуль мы яшчэ не ўлезлі ў нетры. Бо сёння ўжо ні праехаць ні прайсці па Мінску, заўтра — загазаванасць, пачнуць штурхацца, з усёй рэспублікі збяром у Мінску людзей, і мы перанаселены горад», — сказаў Аляксандр Лукашэнка.
Як далажыў кіраўніку дзяржавы мэр Мінску Мікалай Ладуцька, за апошнія 10 гадоў у Мінск ўехала каля 170 тыс. чалавек. У сталіцы пастаянна знаходзіцца каля 2,2-2,3 млн. чалавек, уключаючы студэнтаў. З гэтага года ўведзены абмежаванні па пастаноўцы на чаргу па паляпшэнні жыллёвых умоваў. Стаць на чаргу могуць грамадзяне, якія пражылі ў сталіцы на працягу апошніх пяці гадоў. Што тычыцца дынамікі прыросту чаргі маючых патрэбу ў жыллі, то за 2010 год яе папоўнілі каля 20 тыс. чалавек, а ў перыяд з 2006 па 2011 гады — каля 130 тыс. чалавек.
Аляксандр Лукашэнка нагадаў аб неабходнасці развіцця гарадоў — спадарожнікаў Мінску і арганізацыі там працоўных месцаў.
