Інструмент прыватызацыі не павінен разглядацца як сродак цыравання дзірак. Аб гэтым заявіў прэзідэнт Беларусі Аляксандр Лукашэнка. "Прынцыпы прыватызацыі ў нас даўно вядомыя. Патрабую іх няўхільнага выканання. Але прашу не забываць, што інструмент прыватызацыі не павінен разглядацца як сродак цыравання дзірак. Для нас гэта перш за ўсё спосаб прыцягнення прамых інвестыцый у развіццё эканомікі", — сказаў ён.
Кіраўнік дзяржавы таксама нагадаў аб неабходнасці правядзення працы па дзейсным ўключэнні ў абарачэнне маёмасці, а таксама эфектыўнай кропкавай прыватызацыі дзяржаўнай уласнасці, перадае БелТА.
«Я з вас спытаю ў будучым годзе за тое, як задзейнічаны ўсе свабодныя магутнасці, вытворчыя і невытворчыя ў нашай краіне, — сказаў прэзідэнт на нарадзе з новым складам урада і ізноў прызначанымі службовымі асобамі. — Я гэта тры гады таму даручыў. Вось як раз за пяць гадоў паглядзім, што вы зрабілі ў гэтым напрамку. Вы павінны варушыць ўсіх знізу даверху. Аддаць нават часам за бесцань. Але галоўнае, каб на кожным квадратным метры нявыкарыстаных плошчаў сёння выраблялася прадукцыя».
Пры гэтым Аляксандр Лукашэнка асобна спыніўся на пытаннях знешняга гандлю, падкрэсліўшы, што «тут па-ранейшаму найважнейшай задачай з’яўляецца яе збалансаванасць». Паводле слоў прэзідэнта, за выкананне гэтай задачы адказныя ўсе — урад, Нацыянальны банк, а таксама вобласці, нават да кіраўніка канкрэтнага прадпрыемства.
Лукашэнка: ураду трэба значна перавысіць тэмпы росту экспарту над імпартам
Кіраўнік дзяржавы таксама адзначыў, што па выніках мінулага года адмоўнае сальда знешняга гандлю таварамі і паслугамі склала амаль 7,5 млрд. даляраў. Толькі тавараў у краіну завезлі амаль на дзесяць мільярдаў даляраў больш, чым вывезлі, дадаў Аляксандр Лукашэнка.
«Задача на 2011 год — безумоўнае выкананне зацверджанага важнейшага параметру па сальда знешняга гандлю таварамі і паслугамі. Ураду неабходна забяспечыць значнае перавышэнне тэмпаў росту экспарту над імпартам», — сказаў Аляксандр Лукашэнка, дадаўшы, што «гэтая задача можа быць вырашана з дапамогай зніжэння імпартаёмістасці ВУП і актыўнага нарошчвання экспарту».
Па словах прэзідэнта, для зніжэння імпартаёмістасці «неабходна прыняць вычарпальныя меры па павышэнні энергаэфектыўнасці і навядзенні парадку з матэрыялаёмістасцю, з тым каб наблізіцца да ўзроўню развітых еўрапейскіх краін».
У якасці яшчэ аднаго рэзерву для скарачэння адмоўнага сальда Аляксандр Лукашэнка назваў экспарт паслуг.
