Прэзідэнт Беларусі Аляксандр Лукашэнка не выключае магчымасці поўнай замены ў Беларусі смяротнага пакарання пажыццёвым зняволеннем. "Магчыма, мы неяк выбудуем палітыку, што суды не будуць прымяняць самі вось гэтую жорсткую меру пакарання", — заявіў кіраўнік дзяржавы ў інтэрв'ю найбуйнейшым СМІ Германіі. Паводле слоў прэзідэнта, цалкам адмяніць смяротнае пакаранне ў Беларусі можна толькі правёўшы рэферэндум.
«З вашага пункту гледжання мы здзейснілі вельмі сур’ёзную дэмакратычную памылку ў свой час, разгледзеўшы гэтае пытанне на рэферэндуме. А ў нас рашэнні рэферэндуму вышэйшыя за Канстытуцыйны закон. Таму, каб гэтую праблему вырашыць, нам трэба правесці рэферэндум па адмене таго рашэння», — растлумачыў Аляксандра Лукашэнка.
У той жа час, па словах кіраўніка дзяржавы, настрой беларускага народа з тых часоў па гэтым пытанні абсалютна не змяніўся, нават стаў больш жорсткім. Прэзідэнт падкрэсліў, што ў краіне цяпер праводзіцца шэраг мерапрыемстваў, у тым ліку, грамадскія слуханні з тым, каб «паспрабаваць людзей неяк павярнуць да гэтых еўрапейскіх каштоўнасцяў», перадае БелТА.
«Шчыра кажучы, не вельмі атрымалі поспех, таму што грамадская думка не ўдалося пахіснуць і змяніць», — заявіў Аляксандр Лукашэнка.
Разам з тым прэзідэнт адзначыў, што яшчэ 15 гадоў таму да смяротнага пакарання ў Беларусі прысуджалі ад 30 да 40 чалавек на год, цяпер жа — двух — трох чалавек. «У асноўным мы ўжываем пажыццёвае зняволенне, ну калі ўжо не абуральнае злачынства супраць чалавечнасці», — растлумачыў Аляксандр Лукашэнка.
Як раней перадаваў Тэлеграф, 4 лістапада на прэс-канферэнцыі ў Мінску кіраўнік ведамства федэральнага канцлера Германіі, федэральны міністр па асобых даручэннях Рональд Пафала заявіў, што адмена смяротнага пакарання з’яўляецца абавязковай умовай для партнёрства з Еўропай і неабходным крокам для Беларусі, якая прэтэндуе на месца ў Радзе Еўропы.
У сваю чаргу вядучыя эксперты Рады Еўропы правялі ў Мінску 23 верасня круглы стол па правах чалавека і прававых пытаннях. На сустрэчы еўрапейскія эксперты пракансультавалі прадстаўнікоў беларускіх уладаў па канкрэтных пытаннях, звязаных з ліквідацыяй перашкодаў на шляху да адмены смяротнага пакарання ў Беларусі.
«Адмена смяротнага пакарання ў Беларусі наблізіць гэтую краіну да праваабарончых стандартаў Рады Еўропы, умацуе працэс заканадаўчай забароны смяротнага пакарання ў Еўропе і стане важным сігналам для ўсяго астатняга свету», — адзначылі ў Радзе Еўропы.
