Прэзідэнт Беларусі Аляксандр Лукашэнка не здаволены сучасным станам і тэндэнцыямі развіцця хакея ў Беларусі. Пра гэта беларускі лідар заявіў 12 сакавіка на нарадзе па пытаннях развіцця айчыннага хакея з шайбай. Па словах кіраўніка дзяржавы, за гэтай нарадай рушыць услед яшчэ шэраг нарад на спартовую тэматыку.
Сёння гутарка ідзе пра хакей і аб усім, што звязана з зімовымі відамі спорту, затым адбудзецца сур’ёзная гутарка ў рамках агульнага збору НАК, будзе абмеркаваны ход падрыхтоўкі да блізкай летняй Алімпіяды ў Лондане, распавёў прэзідэнт Беларусі.
Аляксандр Лукашэнка падкрэсліў, што на сённяшняй нарадзе гаворка ідзе пра хакей не таму, што, як прынята лічыць, гэта любімы від спорту прэзідэнта, а таму што для гэтага ёсць некалькі важкіх нагод. Першы — гэты выступ на мінулай Алімпіядзе ў Ванкуверы.
«У мяне гэты выступ выклікае не толькі занепакоенасць, але і нездаволенасць з-за адсутнасці выверанай стратэгіі развіцця хакея напярэдадні блізкага чэмпіянату свету 2014 году ў Мінску», — сказаў кіраўнік дзяржавы
Па-другое, працягнуў беларускі лідар, Алімпійскія гульні прыходзяць і сыходзяць, але наперадзе чэмпіянат свету па хакеі ў Нямеччыне. Таму, упэўнены Аляксандр Лукашэнка, паслабляцца ні ў якім разе нельга. «Але калі мы будзем так гуляць, як у Ванкуверы, дык лепш туды наогул не ехаць і сядзець дома. У Солт-Лейк-Сіці мы былі чацвёртымі, а ў Ванкуверы ці то дзявятымі, ці то дваццатымі. Горш за ўсё, што мы апынуліся невядома дзе», — заўважыў кіраўнік дзяржавы.
Акрамя таго, па словах прэзідэнта, неабходна сур’ёзна разгледзець пытанні далейшага функцыянавання мінскага «Дынама».
«Калі мы будзем і ў наступным годзе гуляць так, як гулялі сёлета ў КХЛ, дык лепш гэтыя грошы выдаткаваць на развіццё хакея ўнутры краіны, чым падарожнічаць ад Уладзівастока да Брэста па абшарах былога СССР», — сказаў Аляксандр Лукашэнка.
Кіраўнік дзяржавы адзначыў, што «Дынама» гуляць магло, пра што сведчаць асобныя матчы, аднак гуляла настолькі няроўна, што гэта сведчыць пра безадказнасць як кіраўніцтва Федэрацыі хакея, каманды, так і саміх гульцоў.
Аляксандр Лукашэнка ўпэўнены, што ва ўмовах сусветнага фінансавага крызісу дзяржаве недазвольна выдаткоўваць вялікія сродкі, якія вылучаюцца на хакей, марна. Таму надалей, папярэдзіў ён, на вялікія грошы без эфектыўнай аддачы разлічваць не варта.
«У хакей сёння не гуляюць — у хакей сёння б’юцца, асабліва на Алімпіядзе і чэмпіянатах свету, а вы ўсё едзеце пагуляць», — адзначыў беларускі лідар, звяртаючыся да ўдзельнікаў нарады. Што да заробкаў хакеістаў, дык, па словах Аляксандра Лукашэнка, дай Бог кожнаму такі заробак, якую мае ў сярэднім хакеіст у Беларусі.
Каментуючы прапановы, якія раней былі агучаны шэрагам спецялістаў пра тое, каб дадаткова да мінскага клуба «Дынама» дэлегаваць для ўдзелу ў розыгрышы КХЛ клуб «Юность» (Мінск), а, магчыма, і нейкую трэцюю каманду, кіраўнік дзяржавы адзначыў, што не супраць гэтага, але толькі тады, калі першая каманда заваюе хоць бы бронзавыя медалі. Таму, працягнуў ён, гутаркі пра тое, каб накіраваць яшчэ адну каманду, трэба спыніць. «Калі ў кагосьці ёсць грошы, дык, калі ласка, плаціце і гуляйце», — сказаў прэзідэнт, падкрэсліўшы, што дзяржава акажа дапамогу толькі тады, калі будуць добрыя вынікі.
Кіраўнік дзяржавы таксама адзначыў недахопы і ў развіцці дзіцяча-юнацкага хакея.
У прыватнасці, на першынствах свету юнацкая каманда 18-гадовых хакеістаў выступае нестабільна, па чарзе то выбываючы з вышэйшага дывізіёна, то вяртаючыся ў яго. Аналагічная сітуацыя складаецца з камандай ва ўзросце да 20 гадоў.
Калі ў 2004-2007 гадах яна пераходзіла з першага ў вышэйшы дывізіён, дык апошнія тры гады запар яна апусцілася на 13-е месца. Усё гэта прыводзіць да высновы, лічыць Аляксандр Лукашэнка, што да цяперашняга часу Федэрацыяй хакея, мінспорта, аблвыканкамамі і Мінскім гарвыканкамам не сфармулявана выразная сістэма і не прыкладаюцца належныя высілкі для выйсця дзіцяча-юнацкага хакея на сусветны ўзровень.
«Узровень гульні каманд абсалютна невысокі. Людзі не накіраваны на барацьбу, няма сучаснага хакея. Усё бачылі, як гуляюць амерыканцы і канадцы на Алімпіядзе: барацьба не тое што на кожным метры, але на кожным сантыметры пляцоўкі», — дадаў Аляксандр Лукашэнка.
