Аляксандр Лукашэнка заклікаў людзей перастаць "стагнаць ў газетах і інтэрнэце" аб тым, што ў Беларусі не праводзяць "структурныя рэформы". Паводле слоў прэзідэнта, так робяць "людзі, якія наогул нічога не ведаюць у эканоміцы, асабліва ў беларускай". Аб гэтым кіраўнік дзяржавы заявіў 17 чэрвеня на прэс-канферэнцыі для цэнтральных і рэгіянальных беларускіх СМІ.
Аляксандр Лукашэнка адзначыў, што ад Беларусі сёння ўсё патрабуюць рэформаў, але пад рэформамі фактычна маюць на ўвазе толькі прыватызацыю. Аляксандр Лукашэнка заявіў, што ён не супраць прыватызацыі, але прадаваць дзяржпрадпрыемствы гатовы толькі за адэкватны кошт.
«Не дай Бог, я прадаў бы прадпрыемства танней. Скруцілі б і сказалі б, што я карупцыянер, што грошы сабе ў кішэню паклаў. Хоць так ужо і кажуць», — заявіў Аляксандр Лукашэнка.
Найбуйнейшыя дзяржпрадпрыемствы, у прыватнасці «Беларуськалі», МАЗ, нафтаперапрацоўчыя прадпрыемствы, Беларусь гатова прыватызаваць толькі пры выкананні пэўных умоў, адзначыў прэзідэнт.
«Я там па-пластунску поўзаў, мадэрнізуючы прадпрыемствы. І мы іх выратавалі, і яны сёння — адны з лепшых у Еўропе», — заявіў кіраўнік дзяржавы.
Прэзідэнт таксама звярнуў увагу на той факт, што на руках у беларусаў сёння ёсць толькі 6-7 млрд даляраў (па некаторых ацэнках — да 30 млрд даляраў). Паводле слоў Аляксандра Лукашэнкі, беларусы не будуць укладваць свае «апошнія грошы» у акцыі гэтых прадпрыемстваў.
«Хто тады купіць нашы прадпрыемствы? Вы ведаеце, хто точыць зубы на нашы прадпрыемствы», — падкрэсліў кіраўнік дзяржавы. У якасці прыкладу Аляксандр Лукашэнка прывёў «Беларуськалі». Па словах кіраўніка дзяржавы, рэнтабельнасць гэтага прадпрыемства складае 70-100%, а ў лепшыя гады прыносіць у бюджэт краіны 3,5 млрд даляраў за год. Тым не менш, Беларусь гатовая прыватызаваць гэтае прадпрыемства.
Умовы для прыватызацыі кіраўнік дзяржавы назваў наступныя: штогадовае павелічэнне заработнай платы працаўнікоў, забеспячэнне сацыяльнай абароны, а таксама фінансавыя ўкладанні ў развіццё прадпрыемства.
