Маркаў: у Лукашэнкі і Пуціна — канфлікт асобаў

«Па-другое, выявілася, што сам Лукашэнка, які некаторы час назад імкнуўся да інтэграцыі, стаў тармазіць працэс аб’яднання, патрабаваць занадта вялікіх саступак ад Расіі. Гэта і паслужыла адной з прычынаў напружаных адносінаў паміж кіраўніцтвамі нашых краінаў», — заявіў Сяргей Маркаў, перадае «Адзіны расійскі партал».

Дэпутат прызнаў, што праект па стварэнні Саюзнай дзяржавы выявіў шэраг ключавых праблемаў. «Першая — неабходнасць пагадзіцца з мадэллю «адна краіна — дзве сацыяльна-эканамічныя сістэмы», — адзначыў палітолаг. — Паводле гэтай мадэлі ў свой час аб’ядноўваліся Кітай і Ганконг. Другая праблема — гэта неабходнасць пераходу да адзінай валюты. Трэцяя — неабходнасць спынення антыкрымлёўскае прапаганды па беларускім тэлебачанні. Некалькі гадоў гэтай прапаганды прывялі да таго, што колькасць беларускіх грамадзянаў, ахвочых аб’ядноўвацца з Расіяй, паменшылася».

Сяргей Маркаў лічыць, што апошняе вельмі важна для самога Аляксандра Лукашэнкі, паколькі, «арганізоўваючы падобную прапаганду, ён стварае ўдзячную глебу для яго празаходняй апазіцыі, якая даўно ўжо падрыхтавала для яго месца ў камеры Мілошавіча». 

«Лукашэнку трэба быць менш падазроным у дачыненні да Расіі, — заявіў расійскі дэпутат. — А нашаму кіраўніцтву варта адставіць у бок суб’ектыўныя, культурна-псіхалагічныя аспекты і больш надаваць увагу аб’ектыўным палітыка-эканамічным аспектам». 

Па словах Сяргея Маркава, праект будаўніцтва Саюзнай дзяржавы не вычарпаў сябе. «Ён мае перспектывы і нам неабходна працаваць па такіх кірунках як прыняцце Канстытуцыі, фармаванне адзінай валюты, фармаванне ўсеабдымнай сістэмы роўнасці правоў грамадзян, пераход да адзінага пашпарта, і аб’яднанне інфармацыйнай прасторы», — падкрэсліў палітолаг.