Беларусь і Еўрапейскі Саюз прасунуліся ў пытанні спрашчэння візавага рэжыму. Пра гэта ў інтэрв'ю тэлеканалу "Беларусь-ТБ" заявіў міністр замежных спраў Беларусі Сяргей Мартынаў. "Цяпер мы прасоўваемся ў кірунку ўрэгулявання візавых адносін паміж Беларуссю і Еўрасаюзам", — адзначыў ён.
Спрашчэнне візавага рэжыму прадугледжвае «зніжэнне кошту шэнгенскіх візаў, будзем спадзявацца, што досыць істотнае, а таксама паскарэнне працэдуры іх выдачы, і, калі можна так сказаць, вялікая прадказальнасць атрымання візы», — падкрэсліў Сяргей Мартынаў.
Паводле яго слоў, міністэрства настойвае, што не павінна быць дыскрымінацыі Беларусі і беларусаў, у тым ліку ў візавых пытаннях, перадае БелТА.
Міністр станоўча адзначыў нядаўнія дамовы Беларусі з Польшчай, Латвіяй і Літвой аб спрошчаным парадку перасячэння мяжы для жыхароў памежных тэрыторый (па 50 км у абодва бакі мяжы). «Такім чынам, для жыхароў памежных тэрыторый будзе практычна неабмежаваная магчымасць перамяшчэння ў дадзенай паласе. Гэта сур’ёзны крок наперад у тэме візавых ўзаемаадносін Беларусі і ЕС», — заявіў ён.
