ААТ "МАЗ" плануе выпусціць у 2011 годзе 50 аўтобусаў з новай "інтэлектуальнай" сістэмай электраабсталявання. Пра гэта паведаміў начальнік аддзела аўтатрактарнай электронікі і электрамеханікі Аб'яднанага інстытуту машынабудавання НАН Беларусі Міхаіл Белавус. Вытворчасць падобных аўтобусаў стала магчымай дзякуючы распрацаванай інстытутам комплекснай інфармацыйна-кіравальнай сістэме.
Сістэма адаптаваная да працы на МАЗ-205 і МАЗ-231. «Кіроўца з дапамогай блока кіравання панэлі прыбораў зможа атрымліваць сігналы аб наяўных няспраўнасцях у транспарце. Акрамя таго, чалавек не здолее зашчыміць сабе руку або нагу ў дзвярах, торбу, чамадан, бо дзверы не зачыняцца, пакуль ёсць нейкая перашкода. Гэта будзе рэгулявацца аўтаматычна, а не кіроўцам», — расказаў Міхаіл Белавус, перадае БелТА.
Паводле слоў спецыяліста, сістэма дазваляе адмовіцца ад электражгутоў на аўтобусе, у выніку чаго эканомяцца каляровыя металы, а таксама значна скарачаюцца час і працазатраты па мантажы бартавой электрычнай сеткі аўтобуса. Тэрмін службы сістэмы складае не менш за дзесяць гадоў.
Стварэннем комплекснай інфармацыйна-кіруючай сістэмы беларускія навукоўцы займаліся каля трох гадоў. Ужо выраблена тры ўзоры «разумных» машын, выпушчана і прададзена МАЗу больш за 40 мікрапрацэсарных блокаў сістэмы коштам каля 100 даляраў кожны. На выраб адной сістэмы неабходна восем-дзевяць блокаў. У 2010 годзе «разумны» аўтобус МАЗ-205 удзельнічаў у міжнародных аўтобусных выставах і «заўваг па працы сістэмы няма», паведаміў Міхаіл Белавус.
