Расія плануе павялічыць адрасную дапамогу СНД і ЕўрАзЭС. Пра гэта заявіў прэзідэнт РФ Дзмітры Мядзведзеў, выступаючы на нарадзе амбасадараў у расійскім МЗС. "Мы павінны павысіць якасць садзейнічання і павялічыць адрасную дапамогу прыярытэтным для нас аб'яднанням СНД і ЕўрАзЭС", — падкрэсліў кіраўнік дзяржавы.
Гаворачы аб праблемах міжнароднай дапамогі, ён адзначыў, што для Расіі «мае значэнне, куды ідуць гэтыя грошы», размяркоўваем, напрыклад, па лініі Сусветнага банка і МВФ, перадае ПРАЙМ-ТАСС. «Гэта, вядома, не такія грошы, як у ЗША і некаторых еўрапейскіх дзяржаваў, але гэта мільёны, сотні мільёнаў, па сутнасці, мільярды даляраў», — сказаў Дзмітры Мядзведзеў.
«Адначасова сёння размова ідзе і аб наданні Расіі новай ролі, — працягнуў расійскі лідар. — Мы зможам на роўных з іншымі вядучымі дзяржавамі свету рабіць свой унёсак у вырашэнне глабальных праблемаў, перш за ўсё, звязаных з эканамічным ростам. А інтэграцыя гэтых дасягненняў у нацыянальную стратэгію развіцця будзе спрыяць умацаванню годнага статусу Расіі ў посткрызісным свеце».
«Менавіта таму варта актывізаваць працу па стварэнні механізму рэалізацыі ўхваленай урадам Канцэпцыі садзейнічання міжнароднаму развіццю», — падкрэсліў прэзідэнт РФ. У сувязі з гэтым ён звярнуў увагу, што «такая праца павінна весціся пры абавязковым жорсткім кантролі за выдаткоўваннем фінансавых сродкаў і з нязменным арыенцірам на забеспячэнне належнай палітычнай аддачы для расійскіх інтарэсаў». «Менавіта з такім настроем мы падыходзім да саміту па Мэтах развіцця тысячагоддзя, які мае адбыцца ў верасні ў Нью-Ёрку», — растлумачыў кіраўнік расійскай дзяржавы.
