Праз павышанага попыту на замежную валюту, які назіраецца ў апошнія месяцы ў Беларусі, пачашчаюцца выпадкі незаконных валютных аперацый. У сувязі з гэтым міліцыянты заклікаюць грамадзян не набываць валюту ў нявызначаных месцах з рук валютчыкаў, бо гэта цягне за сабой адміністрацыйнае пакаранне. Акрамя таго, міліцыянты нагадваюць, што незаконныя валютныя аперацыі спалучаныя з фальшываманецтвам і махлярствам.
Так, 9 красавіка ў Оршы супрацоўнікі транспартнай міліцыі Віцебскага аблвыканкама па падазрэнні ў махлярстве затрымалі 47-гадовага жыхара вёскі Замасточча Аршанскага раёна. Па дадзеных праваахоўнікаў, яшчэ ў сакавіку гэтага года мужчына на чыгуначным вакзале ў Віцебску каля пункта абмену валют, ашуканскім шляхам завалодаў 100 еўра, якія належаць 34-гадоваму жыхару Полацку, абмяняўшы іх на 80 тыс. рублёў.
Згодна з часткай 1 артыкула 11/02 Кодэксу Рэспублікі Беларусь аб адміністрацыйных правапарушэннях, за парушэнне вызначанага парадку правядзення валютных аперацый, то бок скупкі, продажу, абмену замежнай валюты без спецыяльнай ліцэнзіі прадугледжваецца штраф у памеры ад 50 да 300 базавых велічынь (1,75 млн. рублёў — 10,5 млн. рублёў) з канфіскацыяй валюты.
Валютчыкаў ж за неаднаразовую прапанову скупкі, продажу ці абмену замежнай валюты могуць аштрафаваць на 35 — 50 базавых велічынь (1,22 млн. рублёў -1,75 млн. рублёў) з канфіскацыяй прадмета ўгоды (ч.2 арт. 11/02 КаАП РБ). За паўторнае прыцягненне па дадзеным артыкуле валютчыку пагражае штраф у 150 — 300 базавых велічынь (5,25 млн. рублёў — 10,5 млн. рублёў) з канфіскацыяй прадмета ўгоды або адміністрацыйны арышт.
За незаконныя ўгоды з валютай могуць прыцягнуць і да крымінальнай адказнасці
Ва ўпраўленні па барацьбе з эканамічнымі злачынствамі крымінальнай міліцыі УУС Віцебскага аблвыканкама таксама патлумачылі, што грамадзян, якія сістэматычна якія займаюцца незаконнымі валютнымі аперацыямі, могуць прыцягнуць да крымінальнай адказнасці па арт. 233 КК Беларусі. «Дадзены артыкул прадугледжвае адказнасць за ажыццяўленне незаконнай прадпрымальніцкай дзейнасці. У выпадку, калі кошт прадмета ўгоды складае больш за 250 базавых велічынь (8,75 млн. рублёў), санкцыяй указанага артыкула прадугледжваецца пакаранне да трох гадоў пазбаўлення волі. Калі прадмет угоды перавышае тысячу базавых велічынь (35 млн. рублёў), прымяняецца пакаранне да пяці гадоў пазбаўлення волі», — растлумачылі ва УБЭП КМ УУС Віцебскага аблвыканкама.
Старшы оперупаўнаважаны па асабліва важных справах ГУБЭЗ МУС Беларусі Вольга Загароўская паведаміла, што ў міністэрстве замежных спраў існуе картатэка, куды занесены ўсе валютчыкі, якія працуюць яшчэ з 1990-х гадоў. Паводле інфармацыі МУС, у апошні час, пачасціліся выпадкі, калі пад выглядам валютчыкаў дзейнічаюць махляры, якія спрабуюць пры незаконным абмене валюты збыць фальшывыя банкноты, перадае «Камсамольская праўда ў Беларусі».
«Літаральна днямі ў Магілёве супрацоўнікамі АБЭП затрыманы валютчык у дачыненні да якога ўзбуджаная крымінальная справа па ч. 1 арт. 233 Крымінальнага кодэксу Беларусі («Незаконная прадпрымальніцкая дзейнасць»). Санкцыя гэтага артыкула прадугледжвае ад штрафу да пазбаўлення волі тэрмінам да трох гадоў. Мужчына атрымаў даход у 76 млн. рублёў», — распавядае старшы оперупаўнаважаны па асабліва важных справах ГУБЭЗ МУС Вольга Загароўская.
Беларусы прадаюць даляры на аўкцыёнах
Між тым, прадпрымальныя грамадзяне спрабуюць ажыццявіць незаконныя валютныя аперацыі ўжо і ў сетцы інтэрнэт. Так, валюту ўжо пачалі выстаўляць на продаж на некаторых беларускіх інтэрнэт-аўкцыёнах. Да прыкладу, купюру наміналам у 10 даляраў прапаноўваюць купіць па бліц-кошце ў 50 тыс. рублёў (каля 16 даляраў).
