Сёння беларускія ўлады павінны пайсці на перамовы са сваімі палітычнымі апанентамі. Пра гэта заявіў кіраўнік Руху "За Свабоду" Аляксандр Мілінкевіч. "Калі Лукашэнка клапоціцца не толькі аб уласнай уладзе, але і аб краіне, ён павінен ісці на дыялог. А то дачакаецца, як з дэвальвацыяй, што народ вымусіць яго да гэтага на маршы пустых каструляў", — сказаў ён.
«Або Масква скарыстаецца крызісам і танна купіць стратэгічныя прадпрыемствы. Мы не маем права дапусціць, каб наша Айчына стала расійскай правінцыяй. Прымусіць ўлады пайсці на дыялог — гэта тая мэта, якая можа тут і цяпер кансалідаваць апазіцыю. Напрыклад, з Уладзімірам Някляевым (экс- кандыдатам у прэзідэнты — Тэлеграф) мы гаворым пра гэта ў адзін голас, хоць у нас на многае розныя погляды», — цытуе Аляксандра Мілінкевіча яго прэс-служба.
Ён адзначыў, што калі фігуранты «справы 19 снежня» і былыя кандыдаты Мікалай Статкевіч і Дзмітры Ус выйдуць з будынка суда свабоднымі людзьмі, то гэта «добры знак, які сведчыць, што знешні ціск па праблеме палітвязняў дае плён».
Мілінкевіч: ад курсу даляра Нацбанка не было нават палітычнай выгады
«Нацбанк пайшоў нарэшце на дэвальвацыю, хоць гэта трэба было зрабіць некалькі месяцаў таму. Негатыўных наступстваў і для эканомікі краіны, і для дабрабыту насельніцтва было б менш. Які быў сэнс трымаць неадэкватны нацбанкаўскі курс рубля да даляра і еўра — незразумела! Нават палітычнага выніку, што ўсё, маўляў, стабільна, за апошнія тыдні не было ад гэтага. Значыць, камусьці гэта было выгадна», — лічыць Аляксандр Мілінкевіч.
«Кошты на некаторыя прадукты выраслі так, што шакуюць. Грэчка па 20 тыс. рублёў — проста ганьба! Заробкі, «напампаваныя» перад выбарамі, «здзьмуліся». Эканоміка не слухаецца дэкрэтаў і не трывае бясконцага папулізму», — заявіў ён.
Палітык таксама нагадаў, што прэзідэнт краіны не даў беларускім грамадзянам ніякіх тлумачэнняў на конт дэвальвацыі, а замест гэтага з’ехаў у Казахстан. «У краіне выключная сітуацыя — абвяшчаецца дэвальвацыя, але замест звароту да насельніцтва, замест тлумачэнняў і прабачэнняў кіраўнік краіны з’язджае з Беларусі», — сказаў Аляксандр Мілінкевіч.
«Улады да гэтага часу не кажуць уголас аб маштабным і сістэмным крызісе, не робяць аналізу сітуацыі і не прапаноўваюць выхаду. Замест гэтага — андропўшчына, каб утаймаваць сацыяльную напружанасць. Хлусня змешваецца з цынізмам: у крызісе вінавацяць народ — «за пакупніцкі і валютны ажыятаж. Як тут даверу народа да ўладаў не ўпасці ніжэй за плінтус!?» — падсумаваў палітык.
