Лідар Руху "За Свабоду" Аляксандр Мілінкевіч заявіў, што калі на выбарах прэзідэнта Беларусі прадстаўнікі зноў не змогуць назіраць за падлікам галасоў, іх вынікі можа не прызнаць не толькі Захад, але і Расія.
«На будучх выбарах пытанне № 1 для мяне (і я думаю, для Еўропы таксама) — ці будзем мы сумесна лічыць галасы. Калі яны такія моцныя, набіраюць па 80%, дык чаму б нам не зрабіць гэтага разам?» — Сказаў апазіцыйны палітык у інтэрв’ю «Салiдарнасцi».
«А калі зноў так будзе, што нас не будзе ў камісіях, ніхто гэтых выбараў не прызнае. Не ведаю, ці разумее гэта ўлада, але такая сітуацыя прывядзе да палітычнай дэстабілізацыі. Калі яны працягнуць ранейшую практыку, то можа так здарыцца, што і Расія не прызнае гэтых выбараў», — мяркуе Аляксандр Мілінкевіч.
Пры гэтым экс-кандыдат у прэзідэнты назваў «хітрыкамі» апошнюю заяву Аляксандра Лукашэнкі пра тое, што апазіцыя не хоча выйграць на прэзідэнцкіх выбарах. «Што значыць хоча-не хоча? Давайце створым роўныя ўмовы!» — Заявіў лідэр Руху «За Свабоду».
«На выбарах 2006 году больш за 150 чалавек з майго штаба сядзела ў турмах. Па версіі вартавых парадку, культурныя людзі раптам пачалі «лаяцца матам» ці «мачыцца ў сваіх пад’ездах». У лік 70 тыс. членаў выбарчых камісій выпадкова праскочыў адзін наш чалавек. У мяне ёсць шанец трапіць на ТБ толькі раз на пяць гадоў і тое, калі мяне зарэгіструюць кандыдатам у прэзідэнты. Ствараем роўныя ўмовы, праводзім адкрытыя выбары — і я ведаю, што гэтая ўлада іх не выйграе», — падкрэсліў апазіцыйны палітык.
