Аб'яднанне апазіцыі да прэзідэнцкіх выбараў неабходна, але не з'яўляецца самамэтай, заявіў 17 сакавіка лідар Руху «За Свабоду» Аляксандр Мілінкевіч. «Аб'яднанне — гэта прылада. І вельмі важна, каб прылада была эфектыўнай, каб аб'яднанне ішло на зразумелых прынцыпах», — адзначыў палітык.
Лідар Руху «За Свабоду» выступіў супраць аб’яднання ўсіх палітычных сілаў, якія выступаюць супраць дзейснай улады. Палітык адзначыў, што людзям цікавая пэўная праграма дзеянняў апазіцыі пры магчымым прыходзе да ўлады. Таму «аб’яднанне магчыма на вызначаных прынцыпах. Для мяне гэта — прынцыпы дэмакратыі, правоў чалавека, грамадзянскіх свабодаў, незалежнасці і еўрапейскі шлях», — заявіў Аляксандр Мілінкевіч, перадае Euramost.org.
Экс-кандыдат у прэзідэнты выявіў таксама шкадаванне ў сувязі з верагодным няўдзелам прадстаўнікоў беларускіх улад у парламенцкім вымярэнні «Ўсходняга партнёрства» Еўранест.
«А беларуская ўлада ў чарговы раз дапусціла велізарную памылку. Яна не прымусіць Еўрапейскі Саюз прызнаць выбары, якія не прызнаны. Такога ніколі не будзе. Таму формула «пяць плюс пяць» (пяць прадстаўнікоў у «Еўранесце» ўладных структур і пяць — апазіцыі) была ідэальна кампраміснай, і апазіцыя была на яе згодна. Але ўлада гэтага не зразумела. А сілавымі метадамі ў Брусэлі няма чаго рабіць. Там такое не дазваляецца. Гэтая пляцоўка вельмі важная для дыскусій, і вельмі шкада, што гэта будзе не ўнутраная дыскусія для Беларусі. Я лічу, што «пяць плюс пяць» — гэта быў шанец для пачатку ўнутранага дыялогу. Улада да гэтага апынулася не гатовая. Яна нават не гатовая да адказнасці за лёс краіны, якая знаходзіцца ў небяспецы. І палітычнай, і эканамічнай» — адзначыў Аляксандр Мілінкевіч.
Лідар Руху «За Свабоду» таксама выказаўся за паглыбленне супрацоўніцтва Еўрапейскага Саюза і Беларусі.
«Без сур’ёзнага партнёра, якім з’яўляецца Еўрасаюз, мы хутка не мадэрнізуем эканоміку. Мы не палепшым жыццё і не зможам дасягнуць дэмакратызацыі і лібералізацыі», — заявіў Аляксандр Мілінкевіч.
Як раней паведамляў Тэлеграф, першапачаткова прадугледжваўся ўдзел у паседжаннях Еўранеста пяці прадстаўнікоў Нацыянальнага Сходу Беларусі і пяці прадстаўнікоў апазіцыі. Афіцыйны Мінск настойваў на тым, што ўсе дзесяць месцаў для Беларусі павінны заняць прадстаўнікі ўлады.
Тым не менш, як заявіў другога сакавіка ўдзельнік візіту Еўрапарламента ў Мінск еўрадэпутат Юстас Палецкіс, «цуду не адбылося». «Усё схіляецца да таго, што ўсе дзесяць месцаў у Еўранесце аддадуць апазіцыі». Дзясятага сакавіка еўрадэпутаты заявілі, што ў Еўранест ад Беларусі будуць запрошаны дзесяць назіральнікаў-прадстаўнікоў ад грамадзянскай супольнасці і дэмакратычнай апазіцыі, аднак прыняцце канчатковага рашэння па гэтым пытанні чакаецца ў красавіку.
У склад Еўранеста ад Беларусі ўвойдуць: старшыня Беларускай сацыял-дэмакратычнай грамады Станіслаў Шушкевіч, прадстаўнік Рады беларускай інтэлігенцыі Аляксандр Казулін, лідар партыі „Справядлівы свет» Сяргей Калякін, лідар Руху „За Свабоду» Аляксандр Мілінкевіч, старшыня партыі БНФ Аляксей Янукевіч, лідар Аб’яднанай грамадзянскай партыі Анатоль Лябедзька, лідар Беларускага кангрэса дэмакратычных прафсаюзаў Аляксандр Ярашук, прадстаўнік Грамадскага аб’яднання „Экадом» Ірына Капарыха, старшыня Беларускай асацыяцыі журналістаў Жана Літвіна і старшыня непрызнанага Саюза палякаў у Беларусі Анжаліка Барыс.
Першае паседжанне парламенцкай асамблеі «Ўсходняга партнёрства» Еўранест запланавана на 24 сакавіка.
