Кіраўнік справамі Мінгарвыканкама Міхаіл Савановіч выказаў заклапочанасць у сувязі са зніжэннем зваротаў грамадзян у гарвыканкам і іх ростам у іншыя кантралюючыя інстанцыі. Звароты грамадзян з'яўляюцца галоўным крытэрам працы вертыкалі, а іх памяншэнне з'яўляецца паказчыкам зніжэння даверу насельніцтва да гарадской і раённай улады, падкрэсліў кіраўнік справамі.
Як адзначыў Міхаіл Савановіч, у 2009 годзе колькасць зваротаў мінчукоў у Камітэт дзяржкантролю і ў Адміністрацыю прэзідэнта ўзрасла адпаведна на 20% і на 7%. Лідыруе па колькасці скарг і нараканняў сфера ЖКГ, паведамляе БелТА.
Галоўнай прычынай незадаволенасці гараджан кіраўнік справамі назваў стаўленне службоўцаў да зваротаў грамадзян. «Сярод дзяржслужачых не атрымалася выкараніць фармалізм і фанабэрыстасць пры працы з насельніцтвам. Людзі мала ведаюць мясцовую ўладу ў твар», — канстатаваў Міхаіл Савановіч. У сувязі з гэтым службовец прапанаваў часцей практыкаваць сустрэчу з насельніцтвам па месцы жыхарства.
Міхаіл Савановіч заклікаў таксама павялічыць і якасць кансультацыйнай дапамогі людзям і іх інфармавання. Па меркаванні кіраўніка справамі Мінгарвыканкама, зняць вастрыню праблемы дазволіла б стварэнне на сайце Мінгарвыканкама юрыдычнай кансультацыі і размяшчэнне, напрыклад, пераліку знасімых дамоў.
Па словах чыноўніка, перад правядзеннем у горадзе «прац, якія могуць выклікаць незадаволенасць, неабходна старанна прапрацоўваць пытанне і ўлічваць меркаванне мінчукоў». У гэтай сувязі Міхаіл Савановіч адзначыў рост у 2009 годзе колькасці зваротаў мінчукоў у Адміністрацыю прэзідэнта на 4% і ў пракуратуру на 22% з нагоды ўшчыльнення забудовы ў горадзе.
У 2009 годзе ў Мінгарвыканкаме і адміністрацыях раёнаў за парушэнні закона «Пра звароты грамадзян» да дысцыплінарнай адказнасці прыцягнута 76 чыноўнікаў, да адміністрацыйнай — чатыры, што амаль на 20% больш, чым у 2008 годзе.
