Беларускія ўлады вырашылі працягнуць аказанне дапамогі шматдзетным сем'ям для пагашэння запазычанасці па льготных жыллёвых крэдытах. Пра гэта паведаміла міністр працы і сацыяльнай абароны Марыяна Шчоткіна. Паводле яе слоў, такое рашэнне змяшчаецца ў Нацыянальнай праграме дэмаграфічнай бяспекі Беларусі на 2011-2015 гады, праект якой быў ухвалены 21 чэрвеня на пасяджэнні прэзідыума Савета Міністраў.
Кіраўніца мінпрацы ўдакладніла, што сем’і, якія выхоўваюць траіх дзяцей, могуць разлічваць на дапамогу дзяржавы ў пагашэнні 75% запазычанасці па льготных жыллёвых крэдытах. Крэдытную запазычанасць сем’яў, дзе выхоўваецца чацвёра і больш дзяцей, дзяржава будзе пагашаць цалкам, перадае БелТА.
Аднак па-ранейшаму невядома, ці будзе аказвацца дапамога маладым сем’ям у пагашэнні няльготных крэдытаў, што прадугледжвала ранейшая праграма дэмаграфічнай бяспекі. «Дадзенае пытанне таксама знаходзіцца ў стадыі абмеркавання. Гэтая пазіцыя застаецца і ў праекце новай праграмы. Магчыма нават павелічэнне падтрымкі дзяржавы гэтай катэгорыі беларускіх сямей», — заўважыла Марыяна Шчоткіна.
Як ужо перадаваў Тэлеграф, у чэрвені квадратны метр будаванага ў Мінску жылля падаражэў у сярэднім на 1,13 млн рублёў (226 даляраў). Кошт аднапакаёвай кватэры плошчай 43,5 квадратнага метра для маючых патрэбу ў паляпшэнні жыллёвых умоў складае 228 млн рублёў, для астатніх — 272 млн рублёў.
Для атрымання крэдыту на будаўніцтва такой кватэры афіцыйны даход дольшчыка павінен быць большы за 7,5 млн рублёў, максімальны штомесячны плацёж па крэдыце складае 3,7 млн рублёў.