Прадстаўнік галоўнага кіравання МНС Расіі па Мурманскай вобласці, палкоўнік МНС РФ Міхаіл Буцянкоў паведаміў, што калі б беларускія турысты былі больш асцярожнымі, дык трагедыі з лавінай можна было б пазбегнуць. Па словах Міхаіла Буцянкова, выратавальнікі працягваюць шукаць турыстаў з Беларусі, якіх накрыла снежнай лавінай у горным масіве Лавазерскі Мурманскай вобласці, аднак пакуль станоўчых вынікаў няма.
Палкоўнік МНС паведаміў, што выратавальнікі знайшлі двух турыстаў, Дзмітрыя Фаміна і Аляксандра Юрагу, якія здолелі самастойна выбрацца з-пад лавіны. “Цяпер яны знаходзяцца разам з пошукавай групай, якая працягвае шукаць пакінутых пад снегам чацвярых беларускіх турыстаў, сярод якіх дзве дзяўчыны”, — распавёў Міхаіл Буцянкоў, паведамляе «Комсомольская правда в Белоруссии».
“Пакуль я магу засноўвацца толькі на словах Аляксандра Юрагі, а ён яшчэ не адышоў ад стрэсу. Як я зразумеў, яны ішлі замыкальнымі ў групе. Звычайна шчасціць першым ці апошнім. У гэты раз павезла замыкальным“, — сказаў палкоўнік МНС Расіі.
Міхаіл Буцянкоў таксама падкрэсліў, што беларускія турысты дрэнна падрыхтаваліся да паходу, і «што самае галоўнае, яны не зарэгістраваліся». “Калі б яны прыйшлі рэгістравацца, дык выратавальнікі ні ў якім разе не выпусцілі б іх на маршрут з-за магчымага сходу лавін, — распавёў палкоўнік МНС РФ. — Таксама ў кожнага чальца групы павінен быць мабільны тэлефон. А ў іх быў адзін разраджаны мабільны тэлефон з пратэрмінаванай сім-картай, на якой не было грошай“.
Міхаіл Буцянкоў паведаміў таксама, што мабільная сувязь працуе ў вызначаных месцах у гэтай мясцовасці, і ў МНС гэту інфармацыю турыстам падаюць. “Іх бы праінструктавалі і азначылі кантрольныя кропкі для сувязі. У нас звычайна так і робіцца“, — сказаў палкоўнік МНС, дадаўшы пры гэтым, што пошук турыстаў з Брэста будзе ісці кругласутачна, пакуль іх не знойдуць.
Як раней паведамляў Тэлеграф, трэцяга сакавіка група беларускіх турыстаў у складзе шасці чалавек прыбыла ў перадгор’е Хібін Мурманскай вобласці. Група не зарэгістравалася ў Мурманскім пошукава-выратавальным атрадзе, як таго патрабуюць меры бяспекі.
Восьмага сакавіка а 14:30 у паказаным раёне зафіксавалі сход снежнай лавіны. У выніку пад снегам апынуліся чацвёра турыстаў, двое маладых людзёй 1981 і 1989 гадоў нараджэння здолелі выратавацца.
У галоўным кіраванні МНС паведамілі, што пошукавыя працы ўскладняюцца дрэннымі ўмовамі надвор’я. На дадзены момант чацвёра беларускіх турыстаў, сярод якіх дзве дзяўчыны, лічацца зніклымі без весткі.
