Начальніца ўпраўлення фармацэўтычнай інспекцыі і арганізацыі лекавага забеспячэння міністэрства аховы здароўя Людміла Равуцкая 12 кастрычніка заявіла, што на фармацэўтычным рынку Беларусі няма фальсіфікаваных лекавых сродкаў. "У нас абсалютна выключана сітуацыя допуску няякаснай прадукцыі", — дадала спецыялістка.
Па словах Людмілы Равуцкай, усе лекавыя сродкі, зарэгістраваныя ў Беларусі, абавязкова праходзяць кантроль якасці для допуску на рынак. Прэпараты паступаюць па прамых кантрактах ад вытворцаў або іх афіцыйных дыстрыб’ютараў, а да паступлення ў аптэчную сетку праходзяць кантроль якасці ў акрэдытаваных міністэрствам здароўя лабараторыях. Праверка лекаў вядзецца на стадыі рэгістрацыі і пры паступленні на рынак, перадае БелаПАН.
Як паведаміла Людміла Равуцкая, у 2010 годзе было праверана больш за 70 тыс. партый лекавых сродкаў. Прынята 105 рашэнняў аб канфіскацыі медыкаментаў, у большасці сваёй на стадыі допуску да рынку. З іх 10 прымяняліся да прадукцыі расійскіх вытворцаў, 12 — украінскіх, 13 — беларускіх. Начальніца упраўлення адзначыла, што ў абсалютных лічбах паказчык канфіскацыі беларускай прадукцыі вышэйшы, таму што значная яе доля на фармацэўтычным рынку. У дзяржаўнай аптэчнай сетцы беларускія лекі займаюць да 30% прадукцыі.
Адказваючы на пытанне, ці не падпадзе беларускі фармацэўтычны рынак пад небяспеку пранікнення фальсіфікаваных лекаў з Расіі ў сувязі з уваходжаннем Беларусі ў Мытны саюз, Людміла Равуцкая падкрэсліла, што аб узаемным прызнанні рэгістрацыі пакуль гаворка не ідзе.
