Кіраўніка міністэрства энергетыкі Беларусі Аляксандра Азярца прыцягнуць да адказнасці за несвоечасовую аплату за пастаўкі электраэнергіі з Расіі, заявіў 30 чэрвеня першы намеснік прэм'ер-міністра Беларусі Уладзімір Сямашка. Праз запазычанасць, якая ўтварылася, расійская кампанія "Інтэр РАО ЕЭС" 29 чэрвеня спыніла пастаўкі электраэнергіі ў Беларусь.
Між тым Беларусь у найбліжэйшыя два дні цалкам пагасіць запазычанасць перад расейскай кампаніяй «Інтэр РАО ЕЭС» за імпартаваную ў сакавіку-траўні гэтага года электраэнергію, запэўніў Уладзімір Сямашка, перадае БелаПАН.
Як ужо перадаваў Тэлеграф, 29 чэрвеня, ААТ «Інтэр РАО ЕЭС» цалкам спыніла пастаўкі электраэнергіі ў Беларусь праз запазычанасці. Агульная сума доўгу за электраэнергію, якую Расія паставіла Беларусі ў сакавіку — траўні гэтага года, складае каля 1,2 млн расійскіх рублёў.
Для таго, каб разлічыцца з «Інтэр РАО ЕЭС» беларускай кампаніі «Белэнерга» давялося звярнуцца па крэдыт у ААТ «БПС-Банк». Увечары 29 чэрвеня Беларусь ажыццявіла чарговы плацёж у памеры 600 млн расійскіх рублёў для пагашэння запазычанасці. Астатнюю суму доўгу Мінск павінен выплаціць да канца дня 5 ліпеня.
Пастаўкі электраэнергіі ў Беларусь «Інтэр РАО ЕЭС» павінна была аднавіць у 00:00 30 чэрвеня. Аднак па тэхнічных прычынах у 02:00 яны былі ізноў перапыненыя.
