Міністр спорту і турызму Беларусі Алег Качан заявіў, што ў насельніцтва не будзе праблемаў з купляй турыстычных пуцёвак за мяжу ў сувязі з абмежаваннямі на валютным рынку краіны. У якасці пацверджання сваіх словаў кіраўнік спартыўна-турыстычнага ведамства прывёў прыклад беларускіх спартоўцаў.
«Спартоўцы разлічваюцца з дапамогай пластыкавай карты па безнаяўным разліку, і ніякіх праблемаў няма. Беларускія рублі аўтаматычна пераводзяцца ў валюту той краіны, дзе знаходзяцца спартсмены. Што перашкаджае турфірмам працаваць у гэтым кірунку?» — сказаў Алег Качан, перадае БелаПАН.
У сувязі з гэтым міністр спорту і турызму прапанаваў турфірмам ўвесці практыку безнаяўнага разліку за туры. «Усе хочуць працаваць за наяўныя грошы, і зразумела, чаму. А я прапаную працаваць па безнаяным», — адзначыў кіраўнік мінспорту.
Уведзеныя ў апошні час абмежаванні на валютным рынку Беларусі Алег Качан лічыць часовай мерай і выказвае ўпэўненасць што неўзабаве яны будуць адменены.
Тым часам, па дадзеных партала Infobank.by, шэраг беларускіх банкаў увёў чарговыя абмежаванні для ўладальнікаў пластыкавых картак. У гэты раз яны тычацца разліковых аперацый па рублёвых картах, здзейсненымі за межамі Беларусі. Цяпер у адных банках прыпыненыя аперацыі па такіх картках, а ў іншых абмежаванні закранулі толькі колькасці і сумы расходных аперацый.