Міністэрства ўнутраных спраў Беларусі не бачыць парушэнняў закону ў дзеяннях супрацоўнікаў міліцыі ў дачыненні да прадстаўнікоў СМІ падчас разгону несанкцыянаванага мітынгу апазіцыі 19 снежня 2010 году ў Мінску. У афіцыйным адказе МУС на зварот ГА "Беларуская асацыяцыя журналістаў" гаворыцца, што журналісты "мелі магчымасць пакінуць месца правядзення несанкцыянаванага мерапрыемства або адысці на бяспечную адлегласць".
Афіцыйны адказ міністэрства 11 студзеня падпісаў начальнік галоўнага ўпраўлення аховы правапарадку і прафілактыкі міліцыі грамадскай бяспекі МУС Беларусі Віталь Сінякоў, паведамілі ў БАЖ.
«19 снежня 2010 года ў ходзе стрымання несанкцыянаванага масавага мерапрыемства і супрацьпраўных дзеянняў яго ўдзельнікаў супрацоўнікі праваахоўных органаў дзейнічалі строга ў рамках правоў, прадстаўленых ім законам «Аб органах унутраных спраў Рэспублікі Беларусь» і іншымі заканадаўчымі актамі», — адзначаецца ў адказе МУС.
Акрамя таго, у міністэрстве падкрэслілі, што аб адказнасці за ўдзел у несанкцыянаваным мерапрыемстве праваахоўныя органы папярэджвалі загадзя і з самага пачатку акцыі рэкамендавалі грамадзянам пакінуць месца акцыі.
Як раней перадаваў Тэлеграф, падчас разгону несанкцыянаванага мітынгу апазіцыі 19 снежня ў Мінску акрамя членаў апазіцыйных партый і арганізацый былі затрыманыя таксама журналісты, як беларускіх, так і замежных выданняў.
