Выгада Беларусі ад дамоўленасцяў з Расіяй па пастаўках нафты ў 2011 годзе складзе 1,3 млрд. даляраў. Аб гэтым паведаміў 2 лютага журналістам кіраўнік місіі МВФ па Беларусі Крыс Джарвіс. "Мы ацэньваем, што станоўчы ўплыў дамоўленасцяў з Расіяй па пастаўках нафты складзе каля 1,3 млрд. даляраў для Беларусі ў 2011 годзе", — сказаў ён.
«Што тычыцца ўплыву на эканоміку Беларусі дамоўленасцяў у рамках АЭП і дамоўленасцяў з Расіяй па нафце, то мы бачым, што яны будуць станоўча ўплываць на аплатны баланс», — дадаў Крыс Джарвіс, паведамляе БелТА.
Пры гэтым эксперты Міжнароднага валютнага фонду мяркуюць, што «гэта дазволіць знізіць дэфіцыт рахунку бягучых аперацый, які будзе ніжэйшы за леташні, але ўсё роўна застанецца занадта высокім».
Адказваючы на пытанне аб тым, ці лічаць эксперты МВФ неабходным для Беларусі прыцягненне ў сувязі з гэтым дадатковых пазык, Крыс Джарвіс падкрэсліў: «Так, спатрэбіцца прыток капіталу, каб пакрыць дэфіцыт рахунку бягучых аперацый, каб падтрымаць і павысіць узровень рэзерваў».
«Прыток капіталу можа мець розныя формы, — дадаў кіраўнік місіі МВФ па Беларусі. — Беларусь ужо запазычала ў бягучым годзе 800 млн. даляраў шляхам выпуску еўрабондаў і ёсць планы па ажыццяўленні далейшых запазычанняў. Магчымая таксама продаж акцый некаторых прадпрыемстваў».
МВФ: павелічэнне зарплаты можа негатыўна адбіцца на канкурэнтаздольнасці эканомікі Беларусі
Акрамя таго, па словах Крыса Джарвіса, планы па правядзенні структурных рэформаў і эканамічнай лібералізацыі маюць на ўвазе прыцягненне замежных інвестыцый. «Я думаю, што дэфіцыт рахунку бягучых аперацый будзе фінансавацца за кошт спалучэння гэтых фактараў», — адзначыў прадстаўнік МВФ.
Акрамя гэтага, у МВФ лічаць, што ўплыў на павелічэнне дэфіцыту рахунку бягучых аперацый будзе аказваць і павышэнне заробку ў краіне. «Нас турбуе, што такое павелічэнне заработнай платы можа негатыўна адбіцца на канкурэнтаздольнасці беларускай эканомікі», — сказаў Крыс Джарвіс, дадаўшы, што «ў сувязі з гэтым мы рэкамендуем ураду ў 2011 годзе прытрымлівацца стрымлівальнай палітыкі ў дачыненні да зарплаты».
