Экс-кандыдат у прэзідэнты Алесь Міхалевіч, які знаходзіцца цяпер у Чэхіі, мае намер даць Генеральнай пракуратуры Беларусі тлумачэнні да сваёй заявы аб прымяненні катаванняў у следчым ізалятары КДБ. Пра гэта заявіла жонка палітыка Мілана Міхалевіч. У дадзены момант яна высвятляе, якім чынам можна правесці гэтую працэдуру.
Як адзначыла Мілана Міхалевіч, з гэтай мэтай яна ўжо тры дні тэлефануе ў Генпракуратуру. Жанчына просіць звязаць яе з тым супрацоўнікам, які падпісаў позву яе мужу з выклікам для дачы тлумачэнняў. Ёй неабходна высветліць, ці магчыма, напрыклад, прадставіць ведамству натарыяльна завераныя паказанні. Аднак Мілане Міхалевіч адказваюць, што гэты супрацоўнік знаходзіцца ў СІЗА КДБ.
«Відаць, у Генпракуратуры не асабліва імкнуцца атрымаць тлумачэнні», — лічыць жонка экс-кандыдата ў прэзідэнты.
Што да самога Алеся Міхалевіча, які папрасіў прытулку ў Чэхіі, цяпер ён знаходзіцца ў каранцінным лагеры ў Брно. Жонка палітыка не размаўляла з ім, паколькі ў лагеры забараняецца карыстацца мабільнымі тэлефонамі, растлумачыла Мілана Міхалевіч. Аднак Алесь Міхалевіч напісаў ёй праз сеціва, што ў яго ўсё добра.
Грамадскія актывісты не дамагліся праверкі ўмоваў СІЗА КДБ
У сувязі з заявай Алеся Міхалевіча генпракурор Рыгор Васілевіч даручыў правесці ў СІЗА пракурорскую праверку, якая ў цяперашні час працягваецца, растлумачылі ў Генпракуратуры.
Аднак група грамадскіх актывістаў Віцебскай вобласці не атрымала станоўчага адказу на свой зварот да генеральнага пракурора, у якім просяць праверыць ўмовы ўтрымання СІЗА КДБ.
Актывістаў толькі праінфармавалі аб тым, што іх зварот перададзены ў Мінскую гарадскую пракуратуру. «У адказе з Генеральнай пракуратуры згадваецца толькі наша заўвага адносна ўмоваў утрымання ў СІЗА міністэрства ўнутраных спраў. Аб СІЗА КДБ там не напісана зусім», — адзначыў кіраўнік абласной арганізацыі Партыі БНФ Кастусь Смолікаў.
Віцебскія актывісты лічаць, што іх зварот у Генпракуратуры разгледзелі толькі фармальна, і не думаюць, што ведамства правядзе аб’ектыўную праверку па заяве Алеся Міхалевіча аб гвалце і катаваннях у следчым ізалятары, паведамляе праваабарончы цэнтр «Вясна».
Як ужо перадаваў Тэлеграф, Алесь Міхалевіч, які абвінавачваецца ў актыўным удзеле ў масавых беспарадках у Мінску ў дзень прэзідэнцкіх выбараў, быў вызвалены з СІЗА пад падпіску аб нявыездзе. Паводле ўмоў вызвалення палітык не мае права выдаваць інфармацыю па «справе 19 снежня».
Нягледзячы на гэта, палітык 28 лютага выступіў з заявай, у якім распавёў пра ўмовы ўтрымання зняволеных у СІЗА КДБ, паведаміўшы, што там яго фактычна катавалі. Алесь Міхалевіч накіраваў сваю заяву з апісаннем ужытых да яго катаванняў у Генеральную пракуратуру Беларусі, а таксама ў Камітэт па правах чалавека ААН. Між тым, у КДБ адмаўляюць інфармацыю аб прымяненні катаванняў у дачыненні зняволеных следчага ізалятара КДБ, агучаную 28 люты Алесем Міхалевічам.
Экс-кандыдат у прэзідэнты 13 сакавіка пакінуў тэрыторыю Беларусі, аднак яго жонка заявіла, што нікуды з’язджаць не мае намеру.
Аб тым, што беларускі палітык папрасіў прытулку ў Чэхіі, заявіў 17 сакавіка міністр замежных спраў гэтай краіны Карэл Шварцэнберг.
