Міністэрства замежных спраў Беларусі не разглядае ў якасці афіцыйнай агучаную намеснік кіраўніка мінфіна РФ Сяргеем Шаталавым прапанову перагледзець механізм спагнання нафтапошлінаў. Разам з тым, як падкрэсліў намеснік кіраўніка МЗС Беларусі Андрэй Еўдачэнка, заява расійскага боку «з нашага боку не застаецца без увагі».
Як распавёў прадстаўнік беларускага знешнепалітычнага ведамства, Расія яшчэ на сустрэчы 15 кастрычніка неафіцыйна выступіла з прапановай адмяніць пошліну на нафту для Беларусі з адначасовым увядзеннем у якасці кампенсацыі пошліны на беларускія нафтапрадукты і іх наступнае пералічэнне ў расійскі бюджэт, перадае ПРАЙМ-ТАСС.
«Аднак гэтая прапановя, як нам здалося, была нечаканай нават для самога расійскага боку. З нашага пункту гледжання, гэта быў нейкі экспромт, які патрабуе вельмі істотнай дапрацоўкі», — адзначыў Андрэй Еўдачэнка і дадаў, што вакол гэтай прапановы ўзніклі спрэчкі ўнутры самой расійскай дэлегацыі.
«Гэта было сказана ў такім парадку, што не магло быць успрынята ў якасці афіцыйнай прапановы расійскага боку. Для афіцыйных прапаноў ёсць іншыя каналы», — заявіў намеснік кіраўніка МЗС Беларусі.
Як раней паведамляў Тэлеграф, міністэрства фінансаў Расіі распрацавала новы механізм спагнання з Беларусі экспартных пошлін на нафту і нафтапрадукты. У сваю чаргу міністр эканомікі Мікалай Снапкоў 21 кастрычніка заявіў, што Беларусь прымае ўмовы Расіі аб адмене пошлінаў на нафту пры ўмове вяртання ёй пошлінаў на нафтапрадукты.
