Нямецкі ўрад 20 студзеня раскрытыкаваў абвінавачванні афіцыйнага Мінску ў дачыненні ФРГ да масавых беспарадкаў у Беларусі пасля прэзідэнцкіх выбараў у снежні. На думку кіраўніка МЗС Нямеччыны Гіда Вестэрвеле, Аляксандр Лукашэнка з дапамогай "неабгрунтаваных абвінавачванняў" хоча адцягнуць увагу ўсяго свету ад супрацьпраўных дзеянняў беларускіх уладаў.
Еўрасаюз павінен выразна заявіць аб сваёй палітычнай пазіцыі ў адказ на тое, штоздарылася ў выніку выбараў у Беларусі, асабліва на арышты апазіцыі, лічыць нямецкі міністр. Ён таксама праінфармаваў, што амбасадара Беларусі ў Нямеччыне зноў выклічуць ў МЗС, паведамляе беларуская служба Deutsche Welle.
Як раней паведамляў Тэлеграф, 20 студзеня Аляксандр Лукашэнка заявіў, што ў Польшчы і Германіі ствараліся праекты па звяржэнні канстытуцыйнага ладу ў Беларусі.
«Вы, напэўна, звярнулі ўвагу, як люта атакуюць Беларусь немцы і палякі. Я вымушаны сёння сказаць аб тым, што ўсе праграмы і велізарная частка грошай ішлі з Германіі і Польшчы ці праз Нямеччыну і Польшчу. Там жа і пісаліся праграмы звяржэння канстытуцыйнага ладу. І гэта не выдумка спецслужбаў. Гэта паказанні тых, хто гэта арганізоўваў. Ніхто не сумняваецца ў тым, што супраць нашага дзяржавы быў арганізаваны змова. Спансавалі яго замежныя спецслужбы, а ролю выканаўцаў адвялі мясцовым адшчапенцам і жулікам ад палітыкі», — сказаў ён.
Афіцыйныя прадстаўнікі міністэрстваў замежных спраў Германіі і Польшчы выступілі з абвяржэннем дадзеных заяў.
Прэзідэнт Беларусі паведаміў, што прыме самыя жорсткія меры, калі Еўрасаюз ўвядзе супраць Беларусі якія-небудзь санкцыі.
