МЗС Польшчы: неўязных беларускіх чыноўнікаў будзе "больш, чым некалькі"

30.12.2010 13:50
Архив Редакция

Міністэрства замежных спраў Польшчы ў цяперашні час складае спіс службовых асобаў Беларусі, якім будзе забаронены ўезд на тэрыторыю Польшчы. Як патлумачыў 29 снежня прэс-сакратар МЗС Польшчы Марцін Басацкі, у гэты спіс увойдуць не ўсе беларускія чыноўнікі, але іх адназначна будзе "больш, чым некалькі".

Канкрэтныя імёны прэс-сакратар не назваў, але адзначыў, што ва ўездзе на тэрыторыю краіны будзе адмоўлена тым чыноўнікам, якія «сапраўды ўдзельнічалі ў арганізацыі і рэалізацыі хвалі рэпрэсій», якая рушыла за несанкцыянаваным мітынгам у Мінску 19 снежня. Марцін Басацкі таксама паведаміў, што рашэнне аб забароне на ўезд у Польшчу будзе прымацца ў сістэме Шэнген, перадае ІА «REGNUM-Беларусь».

«Гэта азначае, што калі асоба звернецца ў консульства іншай дзяржавы Шэнгенскага пагаднення па атрыманне візы, то загарыцца чырвоная лямпачка. Як правіла, гэта прыводзіць да таго, што асоба не атрымае візу на ўезд ні ў адну з дзяржаў Шэнгена», — растлумачыў Марцін Басацкі.

Прадстаўнік польскага знешнепалітычнага ведамства таксама паведаміў, што Польшча плануе павялічыць дапамогу «грамадзянскай супольнасці Беларусі, адрасаваную непасрэдна сем’ям рэпрэсаваных і накіраваную на развіццё незалежных СМІ і грамадзянскіх ініцыятыў».

Польшча можа павялічыць фінансавую дапамогу беларускай апазіцыі

Па інфармацыі ананімных дыпламатычных крыніц, фінансавая дапамога будзе павялічана з 20 да 40 млн. злотых (каля 13 млн. даляраў) на год. Таксама ёсць інфармацыя аб тым, што ў Варшаве неўзабаве пачне працу новая арганізацыя — Бюро інфармацыі беларускай апазіцыі, перадае польскае навіновае агенцтва PAP.

Як раней перадаваў Тэлеграф, МЗС Польшчы прыняў рашэнне аб адмене з 1 студзеня 2011 года плата за разгляд і выдачу нацыянальных польскіх візаў для беларускіх грамадзян у польскіх консульскіх аддзелах на тэрыторыі Беларусі. Разам з тым МЗС Польшчы пакінуў за сабой права прымаць меры па недапушчэнні ўезду на тэрыторыю Польшчы службовых асобаў і грамадзян Беларусі, якія адказваюць за арганізацыю хвалі рэпрэсіяў супраць грамадзянскай супольнасці з 19 снежня 2010 года.

Как вам новость?