Польскія ўлады пракаментавалі інфармацыю аб забароне на ўезд у краіну прэзідэнта Беларусі Аляксандра Лукашэнкі і яго бліжэйшага атачэння, якая з'явілася раней. Як паведаміла афіцыйная прадстаўніца МЗС Польшчы, "Варшава ўжо падрыхтавала ўласны спіс прадстаўнікоў беларускага рэжыму, якім забаронены ўезд у краіну, ён ужо ўступіў у дзеянне".
Акрамя таго, у МЗС Польшчы адзначылі, што акрамя ўласнага спісу, Варшава таксама актыўна ўдзельнічае ў абмеркаванні спісу асобаў, якім можа быць забаронены ўезд у Еўрасаюз, перадае РБК.
Як ужо перадаваў Тэлеграф, прэс-сакратар МЗС Беларусі Андрэй Савіных заявіў 18 студзеня, што беларускі МЗС пакуль не атрымаў ад Варшавы паведамлення аб забароне на ўезд у Польшчу для прэзідэнта Аляксандра Лукашэнкі і шэрагу беларускіх чыноўнікаў.
Андрэй Савіных адзначыў, што дыпламаты бачылі ў прэсе інфармацыю аб магчымых візавых санкцыях у дачыненні да беларускіх чыноўнікаў з боку Польшчы, але не будуць на яе рэагаваць, пакуль не атрымаюць афіцыйнага пацверджання па сваіх каналах.