МЗС: Варанецкі ў палацы Грыбаўскайце абмяркоўваў АБСЕ

06.01.2011 14:33
Архив Редакция

Намеснік міністра замежных спраў Беларусі Валеры Варанецкі ў рамках працоўных кансультацый з міністэрствам замежных спраў Літвы абмяркоўваў пытанні супрацоўніцтва Беларусі з АБСЕ. Пра гэта паведаміў прэс-сакратар МЗС Беларусі Андрэй Савіных.

Па словах прадстаўніка беларускага знешнепалітычнага ведамства, кансультацыі праводзіліся па ініцыятыве абодвух бакоў і тычыліся перспектыў узаемадзеяння дзяржаў-членаў АБСЕ ў кантэксце старшынства Літвы ў гэтай арганізацыі, распавялі ў міністэрстве.

«Закраналіся пытанні супрацоўніцтва Беларусі з АБСЕ пасля спынення дзейнасці офіса АБСЕ ў Мінску», — сказаў Андрэй Савіных, дадаўшы, што «ў межах кансультацый таксама абмяркоўваліся пытанні ўзаемаадносін па лініі Беларусь — ЕС».

Як ужо паведамляў Тэлеграф, 5 студзеня ў другой палове палац прэзідэнта Літвы Далі Грыбаўскайце наведалі пасол Беларусі Уладзімір Дражын і намеснік міністра замежных спраў Беларусі Валеры Варанецкі. Прэс-сакратар прэзідэнта Літвы Лінас Бальсіс заявіў, што беларускія дыпламаты сустракаліся не з самой Даляй Грыбаўскайце, а з дарадцам па знешняй палітыцы Дарусам Сямашкам.