У панядзелак, 16 траўня, з раніцы курс беларускага рубля на міжбанкаўскім рынку ўпаў з 5,9 тыс. рублёў да 6,3-6,5 тыс. рублёў за даляр. Па словах крыніцы, на рынку ўсталяваліся даволі хаатычныя каціроўкі. Між тым у абменных пунктах беларускіх банкаў курс даляра па-ранейшаму трымаецца на ўзроўні 4 тыс. рублёў.
Па словах галоўнага эканаміста інвестыцыйнай кампаніі Renaissance Capital Чарлі Робертсана, паслабленне курсу беларускага рубля можа станоўча адбіцца на канкурэнтаздольнасці экспарцёраў калійных угнаенняў. На думку замежнага эксперта, у цяперашні час экспарцёрам гэтага не хапае, перадае Dow Jones.
На мінулым тыдні пасля адмены рэкамендацый Нацыянальнага банка па абменным курсе валюты беларускія банкі трымалі курс на ўзроўні 4 тыс. рублёў за даляр. Крыніцы на рынку тлумачаць падобную стабільнасць рубля тайнымі рэкамендацыямі Нацбанка аб максімальна дапушчальным курсе. У пачатку гэтага тыдня, па інфармацыі крыніцы, новых рэкамендацый утрымліваць курс на пэўным узроўні не паступала, аднак і аб адмене абмежаванняў нічога не паведамлялася, перадае Reuters.
Між тым, як паведамляў Тэлеграф, Нацбанк Беларусі адмаўляе інфармацыю аб сакрэтных рэкамендацыях не падымаць курс продажу даляра ў абменных пунктах вышэй за 4 тыс. рублёў.
Пасля адмены Нацбанкам абмежаванняў па валютным курсаўтварэнні для продажу валюты насельніцтву да раніцы 12 траўня ўсе камерцыйныя банкі правялі фактычную дэвальвацыю беларускага рубля прыкладна на 30% і сталі прадаваць даляры па курсе да чатырох тысяч рублёў. Крыніца ў банкаўскіх колах заявіла Тэлеграфу, што беларускія камерцыйныя банкі гатовы прадаваць даляр па пяць тысяч рублёў.
