Нацыянальны банк Беларусі не збіраецца праводзіць аднамомантавую дэвальвацыю рубля, нягледзячы на рэкамендацыі Міжнароднага валютнага фонду. Пра гэта заявіў начальнік упраўлення інфармацыі, прэс-сакратар банка Анатоль Драздоў, каментуючы справаздачу МВФ для кансультацый 2011 года па артыкуле IV.
У ім, у прыватнасці, спецыялісты раяць зрабіць больш жорсткімі падаткова-бюджэтную і грашова-крэдытную палітыку.
«Нацбанк аднойчы ўжо выканаў рэкамендацыі МВФ па правядзенні дэвальвацыі за адзін раз і пераканаўся, што яна не аказала заўважнага станоўчага ўздзеяння на стан плацежнага балансу. Да таго ж дэвальвацыя мела шэраг негатыўных наступстваў, у тым ліку адбілася на іміджы Нацыянальнага банка», — цытуе Анатоля Драздова БелТА.
Па словах прэс-сакратара, вакол аплатнага балансу ў беларускай эканоміцы задзейнічаны абсалютна іншыя фактары. Аднак, заўважылі ў Нацбанку, Беларусь будзе, як і раней, «з павагай ставіцца да рэкамендацый МВФ» і мае намер працягваць супрацоўніцтва з фондам.
Як ужо перадаваў Тэлеграф, 22 лютага МВФ рэкамендаваў беларускім уладам узмацніць жорсткасць грашова-крэдытнай палітыкі і правесці дэвальвацыю нацыянальнай валюты да ніжняй мяжы прагнозу — 8% да кошыка замежных валют. Аднак старшыня праўлення Нацбанка Пётр Пракаповіч праінфармаваў, што ў бліжэйшы час праводзіць дэвальвацыю рубля не плануецца. Пасля гэтага МВФ заявіў, што ўлады Беларусі баяцца палітычных рызык, і назваў эканамічную палітыку краіны «занадта слабой».
