Асобам, затрыманым па падазрэнні ў датычнасці да інцыдэнту ў амбасадзе Расіі, прад'явілі абвінавачанні па іншых артыкулах крымінальнага кодэксу. Падчас ператрусаў па месцы пражывання падазраваных міліцыя знайшла патроны, наркатычныя сродкі расліннага паходжання, маскі з проразямі для вачэй, літаратуру, якая прапагандуе ідэі анархізму.
У дачыненні да аднаго з семярых затрыманых грамадзян Беларусі ўжо ўзбуджаная крымінальная справа па ч.1 арт.328 КК Беларусі (незаконны зварот наркатычных сродкаў, псіхатропных рэчываў і іх прэкурсораў), паведамілі ў МУС.
У цяперашні час усе затрыманыя ўтрымліваюцца ў ІЧУ ГУУС Мінгарвыканкама.
Як раней паведамляў Тэлеграф, увечары 30 жніўня невядомыя кінулі на тэрыторыю расійскага пасольства ў Мінску 2 бутэлькі з запальнай сумессю. У выніку інцыдэнту ніхто не пацярпеў, адна бутэлька трапіла ў прыпаркаваны на тэрыторыі амбасады аўтамабіль, ахова пасольства справілася з пажарам самастойна.
Па фактах здарэння былі ўзбуджаныя крымінальныя справы па ч.2 арт. 218 (наўмыснае знішчэнне або пашкоджанне маёмасці) і ч. 1 арт. 339 (хуліганства).
2 жніўня з’явілася заява, у якой адказнасць за нядаўні інцыдэнт на тэрыторыі расійскай амбасады ў Мінску ўзяла на сябе анархісцкая групоўка пад назвай «Сябры Свабоды». Як гаворыцца ў заяве, інцыдэнт ля амбасады быў акцыяй пратэсту супраць арыштаў у дачыненні да актывістаў, якія выйшлі на абарону Хімкінскага лесу ў Маскве.
