Эканамічныя санкцыі супраць Беларусі не прынясуць жаданага выніку. Такое меркаванне агучыў старшыня аргкамітэту па стварэнні Партыі свабоды і прагрэсу Уладзімір Навасяд. Па словах палітыка, санкцыі не падзейнічаюць з той прычыны, што "беларускае грамадства ўжо звязвае лібералізацыю, дэмакратычныя свабоды з узроўнем і якасцю жыцця".
«І палітыка адчыненых дзвярэй як раз і спрыяла тым падзеям, якія адбываліся ў нас, у тым ліку і на Плошчы. Таму такая палітыка павінна быць працягнутая і нацэлена на ўцягванне Беларусі ў еўрапейскі кантэкст сістэмы каардынат, павінна дапамагаць людзям інтэгравацца. Тое, што цяпер робяць па візавым пытанні Польшча і Літва, я толькі вітаю», — цытуе Уладзіміра Навасяда БелаПАН.
Палітык таксама быў сярод тых, што 9 студзеня падпісалі дэкларацыю аб стварэнні Нацыянальнай каардынацыйнай рады, адной з задач якога з’яўляецца дамагацца вызвалення арыштаваных па палітычных матывах грамадзян. Таксама ў задачу рады будзе ўваходзіць інфармаванне беларусаў і міжнароднай грамадскасці аб сітуацыі ў краіне, дамагацца вяртання Беларусі на шлях законнасці і дэмакратыі, ствараць умовы для правядзення свабодных выбараў.
«Дэмакратычная грамадскасць заклапочаная сітуацыяй, што склалася ў краіне пасля выбараў», — сказаў Уладзімір Навасяд.
Па словах палітыка, нягледзячы на розныя падыходы да вырашэння сітуацыі паміж сіламі і партыямі, якія прысутнічаюць у радзе, «мы адзіныя ў адным: людзі павінны быць вызваленыя». «Нас турбуе лёс экс-кандыдатаў у прэзідэнты, якія знаходзяцца пад арыштам. Ніхто з іх не збіраецца куды-небудзь эміграваць, яны могуць, знаходзячыся дома, калі таго патрабуюць следчыя дзеянні, прыходзіць і даваць паказанні», — адзначыў Уладзімір Навасяд.
Гаворачы аб дапамозе ў атрыманні адукацыі за мяжой тым беларускім студэнтам, хто будзе адлічаны з ВНУ за палітычную дзейнасць, палітык лічыць, што гэта не будзе праблемай. У той жа час, па словах Уладзіміра Навасяда, Беларусь уваходзіць у такую актыўную фазу свайго развіцця, што «маладыя мазгі і рукі павінны працаваць тут, інакш краіна прайграе ад падобнай палітыкі».
