Першы намеснік міністра ўнутраных спраў Беларусі і начальнік крымінальнай міліцыі Алег Пякарскі ўключаны ў спіс неўяздных беларускіх службоўцаў у краіны Еўрасаюза. Тым не менш, ён узначаліў беларускую дэлегацыю на 54-й сэсіі Камісіі ААН па наркатычных сродках, якая праходзіць 21-25 сакавіка ў сталіцы Аўстрыі Вене.
У ходзе мерапрыемства намеснік міністра выступіў з дакладам аб беларускім вопыце ў сферы процідзеяння распаўсюджванню наркотыкаў. У прыватнасці, ён выказаў меркаванне, што ЕС і Беларусі неабходна пашыраць супрацоўніцтва, а не ствараць штучныя межы, паведамілі ў МУС.
«Стварэнне штучных межаў паміж Беларуссю і Еўрасаюзам прывядзе да адсутнасці належнага ўзаемадзеяння паміж праваахоўнымі органамі і павелічэння кантрабанды наркатычных сродкаў у краіны ЕС», — адзначыў Алег Пякарскі.
Таксама ён паведаміў, што для Беларусі з’яўляецца характэрным незаконнае абарачэнне наркотыкаў, і праінфармаваў аб тым, якімі спосабамі беларускія спецыялісты з ім змагаюцца. Намеснік міністра дадаў, што за 2010 год у краіне было перакрыта каля 50 каналаў наркапаставак, і каля 25 з іх арганізоўваліся для перавозу адурманьваючых сродкаў у ЕС.
Алег Пякарскі заявіў, што Беларусь хоча вывучыць досвед лячэння ад нарказалежнасці, прафілактыкі наркаманіі і зніжэння яе наступстваў для грамадства, які ёсць у еўрапейскіх краінах.
У аўторак, 22 сакавіка, беларускі намеснік міністра сустрэўся з выканаўчым дырэктарам упраўлення ААН па наркотыках і злачыннасці (УНП ААН) Юрыем Фядотавым. Яны абмеркавалі пытанні барацьбы з наркотыкамі, гандлем людзьмі, а таксама супрацоўніцтва ў рамках Міжнароднага навучальнага цэнтра падрыхтоўкі кадраў у галіне міграцыі і процідзеяння гандлю людзьмі і іншыя праблемы.
Як ужо перадаваў Тэлеграф, з 2 лютага ў дачыненні да 158 беларускіх чыноўнікаў дзейнічаюць візавыя санкцыі ЕС. Асобам, уключаных у спіс, забаронены ўезд на тэрыторыю ЕС. 21 сакавіка ЕС прыняў рашэнне пашырыць спіс неўязных беларускіх службоўцаў, «у сувязі з пагаршэннем сітуацыі з выкананнем правоў чалавека ў Беларусі», уключыўшы ў яго яшчэ 19 чалавек.