Нямецкіх і польскіх грамадзян, якія 25 красавіка ў Мінску ўдзельнічалі ў акцыі супраць будаўніцтва беларускай АЭС, дэпартавалі з Беларусі. Пра гэта паведаміў аднадумец затрыманых, грамадскі актывіст Аляксандр Ярашэвіч. "Увечары іх пад канвоем даставілі на чыгуначны вакзал і пасадзілі на цягнік у Варшаву, які адыходзіць у 20:40", — паведаміў ён.
Дэпартаваных суправаджалі супрацоўнікі праваахоўных органаў да самай беларуска-польскай мяжы. «Умовы ўтрыманьня ў Цэнтры ізаляцыі правапарушальнікаў былі не вельмі. За два дні іх кармілі мала. Толькі ў судзе грамадзяне Германіі змаглі пагутарыць з прадстаўніком нямецкага пасольства, хаця яны патрабавалі такой сустрэчы з моманту затрымання», — удакладніў Аляксандр Ярашэвіч.
Ён таксама праінфармаваў, што грамадзянам Германіі забаронены ўезд у Беларусь на працягу двух гадоў, грамадзянцы Польшчы — на працягу года.
Як ужо перадаваў Тэлеграф, увечары 25 красавіка ў Мінску міліцыя затрымала 12 удзельнікаў двух пікетаў супраць будаўніцтва ў Беларусі атамнай электрастанцыі. Гэта грамадзяне Беларусі Ягор Яромчанка, Алена Вітка і Сяргей Слюсар, грамадзяне Германіі Юльяна Грынец, Андрэас Шэлхас, Яніна Ролік, Гвіда Гансэн, Ян Гендрык Украп і Катрын Гайнрых, а таксама грамадзянка Польшчы Дарота Кубашэўска.
Суд Фрунзенскага раёну Мінску 26 Красавік аштрафаваў удзельнікаў пікету на 525-700 тыс. рублёў. Іх абвінавацілі ў тым, што яны на прыпынку грамадскага транспарту перашкаджалі руху грамадзян, трымалі ў руках расцяжку з надпісам «Мы супраць ядзернага рэактара», выкрыквалі лозунгі і прыцягвалі да сябе ўвагу.
