Былы кандыдат у прэзідэнты Беларусі Уладзімір Някляеў, якога абвінавачваюць ва ўдзеле, а таксама ў арганізацыі і падрыхтоўцы "дзеянняў, якія груба парушаюць грамасзкі парадак", лічыць неабгрунтаванымі прад'яўленыя абвінавачанні. Палітык лічыць крымінальныя працэсы па "справе 19 снежня" палітычнымі. На думку Уладзіміра Някляева, фігурантаў справы судзяць за тое, што яны (і сам палітык у іх ліку) "дамагаліся свабодных выбараў".
«Усіх нас, хто знаходзіцца і ў гэтым судзе, і ў іншых судах на лаве падсудных па так званай «справе 19 снежня», абвінавачваюць па сутнасці ў адным: у тым, што мы дамагаліся свабодных, справядлівых, дэмакратычных выбараў і іх сапраўдных вынікаў. Але паколькі артыкула, па якім напрамую за гэта можна было б судзіць і караць, у Крымінальным кодэксе няма, нас судзяць і караюць за Плошчу. Адных — як яе арганізатараў, іншых — як удзельнікаў, але ўсіх — за адно», — падкрэсліў Уладзімір Някляеў.
Падчас свайго выступу ў судзе 6 траўня палітык заявіў, што ён не зрабіў нічога з таго, што было агучана пракурорам. Паводле яго слоў, пракурор спрабуе паставіць у віну палітыку яго намеру, у той час яго непасрэдны ўдзел у падзеях 19 снежня заняў не больш за сем хвілін, пасля чаго ў выніку інцыдэнту з міліцыяй на вуліцы Няміга палітык атрымаў чэрапна-мазгавую траўму і быў дастаўлены ў шпіталь», перадае «n#####n».
Някляеў: за сем хвілін я не мог зрабіць нічога, за што мяне можна было б судзіць
«Мой удзел у падзеях 19 снежня заняў сем хвілін часу. Не расцягнутага касмічнага, а звычайнага зямнога. Так што я не разумею, што я раблю ў гэтым судзе, калі толькі ў бяспамяцтве не зрабіў за тыя сем хвілін нешта такое, за што мяне можна судзіць», — заявіў палітык.
Уладзімір Някляеў падкрэсліў у сваім выступе, што судзіць чалавека варта «толькі за тое, што ён зрабіў, а не за тое, што ён мог бы, ці нават збіраўся зрабіць.
Падчас свайго выступу ў судзе экс-кандыдат у чарговы раз абвінаваціў улады ў фальсіфікацыі прэзідэнцкіх выбараў — не толькі апошніх, 2010 года, але і папярэдніх выбараў 2001 і 2006 гадоў. Па словах палітыка, фактаў фальсіфікацыі вынікаў выбараў дастаткова, таму абвінавачваць апазіцыйных лідараў у тым, што падстава для акцыі пратэсту была «надуманая» неправамерна.
Уладзімір Някляеў таксама абверг заявы дзяржабвінаваўцы аб тым, што апазіцыя загадзя рыхтавалася да сутыкненняў з міліцыяй на плошчы падчас мітынгу. Экс-кандыдат адзначыў, што падчас свайго тэлевыступу падчас перадвыбарнай кампаніі ён заклікаў людзей прыйсці на Кастрычніцкую плошчу, каб адсвяткаваць перамогу на выбарах дэмакратычнага кандыдата. Акцыя пратэсту ж, па словах Уладзіміра Някляева, апазіцыйнымі лідарамі не планавалася, але разглядалася ў якасці магчымага варыянту ў выпадку, калі перамогу на выбарах атрымае Аляксандр Лукашэнка, якога яны лічаць нелегітымным прэзідэнтам.
Уладзімір Някляеў таксама нагадаў аб тым, што права свабодна збірацца на мітынг, дэманстрацыі і шэсця беларусам гарантуе Канстытуцыя, і гэта права нельга «адмяніць пастановамі ведамстваў». «Тым больш нельга забараніць скарыстацца гэтым канстытуцыйным правам у дні, якія з’яўляюцца вызначальнымі для будучыні дзяржавы і народа», заявіў Уладзімір Някляеў у сваім выступе, з поўным тэкстам якога можна азнаёміцца тут.
Судовае слуханне па справе Уладзіміра Някляева аднавілася ў аўторак, 10 траўня, у 10:00 у судзе Фрунзенскага раёна Мінску. У цяперашні час суд праводзіць допыт экс-кандыдата.
Як раней перадаваў Тэлеграф, разам з Уладзімірам Някляевым ў рамках аднаго працэсу судзяць яшчэ аднаго экс-кандыдата Віталя Рымашэўскага, а таксама давераную асобу Някляева Сяргея Вазняка, былога кіраўніка і сябра штаба Някляева Андрэя Дзмітрыева і Аляксандра Фядуту, а таксама Насту Палажанку. Іх абвінавачваюць па ч.1 арт.342 (арганізацыя і падрыхтоўка дзеянняў, што груба парушаюць грамадскі парадак, ці ўдзел у іх). Сяргею Вазняку, акрамя таго, прад’яўленыя абвінавачанні па ч.1 арт.401 (заведама ілжывае паказанне). Максімальнае пакаранне, якое па гэтых абвінавачаннях можа пагражаць фігурантам «справы 19 снежня» — тры гады пазбаўлення волі.
