Кандыдат у прэзідэнты Беларусі, лідар грамадзянскай кампаніі «Гавары праўду!» Уладзімір Някляеў заклікаў 9 снежня падчас пікету каля Адміністрацыі прэзідэнта ўсіх кандыдатаў зняцца з выбараў. «Я лічу, што нам усім варта зараз абнуліць рэйтынгі і разам заявіць аб немагчымасці прызнання гэтых выбараў. І разам выйсці на Плошчу 19 снежня, каб запатрабаваць там новых выбараў, ужо без Лукашэнкі», — сказаў ён.
«Адначасовае зняцце сваіх кандыдатураў узмоцніць апазіцыю і Плошчу. Нам нельга дапусціць, каб выбары былі прызнаныя міжнароднымі структурамі. Прызнанне выбараў — гэта будзе наша параза. Калі мы ўсе разам здымем свае кандыдатуры — гэта будзе моцны крок», — заявіў Уладзімір Някляеў, перадае «n#####n».
Палітык адзначыў, што выбары ўжо можна лічыць недэмакратычнымі. На яго думку, ні Расія, ні ЕС іх прызнаваць не павінны. «Калі ЕС прызнае гэтыя выбары, то гэта будзе ўжо занадта «рэалпалітык», — лічыць Уладзімір Някляеў.
Прадстаўнікі штабу Уладзіміра Някляева падрыхтавалі заснаваны на дакладзе юрыста Гары Паганяйлаы дакумент, які, на іх думку, даказвае недэмакратычнасць прэзідэнцкіх выбараў у Беларусі.
Акрамя таго, Уладзімір Някляеў звярнуўся асабіста да прэзідэнта Аляксандра Лукашэнкі. «Ён схаваўся ў тым вялікім доме. Абвінаваціў мяне ў сувязях з Расіяй, сказаў, што мае доказы і схаваўся. Факты на тумбачку! Хай прыйдзе на дэбаты і ў прамым эфіры пакладзе факты на тумбачку», — заявіў лідар «Гавары праўду!».
Некаторыя з кандыдатаў у прэзідэнты плануюць абмеркаваць магчымасць зняцця сваіх кандыдатур з выбараў ужо сёння, 9 снежня.
Рымашэўскі, Ус і Цярэшчанка не бачаць сэнсу ў зняцці з выбараў
Між тым, кандыдаты ў прэзідэнты Віталь Рымашэўскі, Дзмітры Ус і Віктар Цярэшчанка заявілі падчас дэбатаў на партале tttt_tel, што здымацца з прэзідэнцкіх выбараў няма сэнсу. «Лепш хай усе кандыдаты ствараюць грамадскае меркаванне, са сваімі выбаршчыкамі, са сваімі знаёмымі аб тым, што цяпер адбываецца ў рэспубліцы. Я думаю, што трэба ўсім дамагацца, каб выбарчая сістэма была зменена», — лічыць Дзмітры Ус.
Па словах лідара БХД Віталя Рымашэўскага, пакуль пытанне аб зняцці з выбараў на чыю-небудзь карысць не стаіць. «На парадку дня зараз стаіць пытанне аб барацьбе за змену ўлады, за тое, каб людзям даць права выбару, за свабоду і дэмакратыю», — заявіў ён.
Па словах Віталя Рымашэўскага, усе альтэрнатыўныя кандыдаты супрацьстаяць «аднаму ўзурпатару». «Калі не будзе фальсіфікацыі выбараў, то непазбежна будзе другі тур, і тады лідар вызначыцца сам сабой. І я ўпэўнены, што мы ўсе, я і мае калегі, падтрымаем гэтага чалавека», — лічыць палітык.
У той жа час Віктар Цярэшчанка лічыць, што наяўнасць вялікай колькасці кандыдатаў не з’яўляецца пройгрышам. «Тут няма пройгрышу. Калі будзе адзін і дзевяць, то гэта будзе лепш, чым адзін і адзін», — лічыць Віктар Цярэшчанка.
