Рэспубліканскае грамадскае аб'яднанне "Перспектыва" звярнулася да кіраўніка Адміністрацыі прэзідэнта Беларусі Уладзіміра Макея з просьбай растлумачыць сітуацыю наконт найманых асобаў для індывідуальных прадпрымальнікаў. Кіраўнік аб'яднання Анатоль Шумчанка просіць улады праінфармаваць дзелавую супольнасць, на якой стадыі распрацоўкі знаходзіцца праект указа "па найманых асобах для індывідуальных прадпрымальнікаў".
У РГА «Перспектыва» адзначылі, што чыноўнікі міністэрстваў эканомікі яшчэ ў снежні 2010 года казалі аб тым, што на подпіс прэзідэнту краіны ўжо накіраваны праект указа па наймітах ІП.
«Ці адпавядае рэчаіснасці дадзеная інфармацыя, і калі так, то на якой стадыі яна знаходзіцца ў цяперашні час? Пастаноўка дадзенага пытання выклікана шматлікімі і рэгулярнымі пытаннямі саміх прадпрымальнікаў адносна праблемы найманых асоб. Асабліва, на іх думку, гэта актуальна выглядае на фоне прынятай Дырэктывы № 4»- гаворыцца ў лісце кіраўніка грамадскага аб’яднання.
У лісце кіраўніцтва РГА «Перспектыва» выказала надзею на разуменне з боку ўладаў і на плённае супрацоўніцтва, а таксама адзначыла, што ўся прадпрымальніцкая супольнасць спадзяецца на больш хуткае і станоўчае рашэнне дадзенага пытання.
«РГА «Перспектыва» прапаноўвае прадугледзець зняцце ўсіх існых абмежаванняў па найме работнікаў індывідуальнымі прадпрымальнікамі, без падзелу іх па якіх-небудзь прыкметах і ўмовах, і, адпаведна, ліквідаваць усе абмежаванні па найме работнікаў для індывідуальных прадпрымальнікаў Беларусі ў галіне прыцягнення толькі блізкіх сваякоў», — гаворыцца ў звароце кіраўніка аб’яднання.
Згодна з разлікамі экспертаў РГА «Перспектыва», падобная мера дазволіць індывідуальным прадпрымальнікам Беларусі стварыць не менш за 65 тыс. дадатковых працоўных месцаў і адпаведна павялічыць падатковыя паступленні ў бюджэт краіны. «Гэты крок будзе годным прыкладам шчырага жадання дзяржавы дапамагчы беларускаму народу ў гэтыя няпростыя часы выжыць і выйсці без вялікіх стратаў ва ўмовах наступстваў сусветнага фінансавага крызісу», — падкрэсліў у сваім лісце Анатоль Шумчанка.