У аўторак, 14 чэрвеня, у Капенгагене (Данія) адбылася сустрэча прадстаўнікоў працоўнай групы па Беларусі Парламенцкай асамблеі АБСЕ, на якой бакі выпрацавалі агульны падыход да пытанняў садзейнічання правам чалавека ў Беларусі. Працоўная група распрацавала рэзалюцыю па сітуацыі ў краіне, якая будзе прадстаўлена для галасавання на штогадовай сэсіі ПА АБСЕ, якая пачне сваю працу 6 ліпеня ў Бялградзе.
У сустрэчы ў Капенгагене ўзялі ўдзел парламентарыі ад Нямеччыны (Ута Цапф, кіраўнік групы), Італіі (Клаўдыё Д’Аміка), Польшчы (Павел Панцілюш) і Літвы (Вілія Алекнайце-Абрамікене), паведамілі ў АБСЕ.
Парламентарыі чарговы раз заклікалі ўлады Беларусі неадкладна вызваліць асуджаных за дэманстрацыю 19 снежня апазіцыянераў.
«Утрымліваючы ў турме апазіцыйных дзеячаў і адмаўляючыся выдаваць візы міжнародным экспертам і праваабаронцам, Мінск зноў і зноў выказвае сваю прыхільнасць да аўтарытарнай ізаляцыі. Мы спадзяемся, што ўлады зменяць курс», — адзначыла падчас сустрэчы Ута Цапф.
Распрацаваная рэзалюцыя, па словах кіраўніка працоўнай групы, накіраваная на аднаўленне дыялогу з беларускімі ўладамі. У дакуменце ўтрымліваецца заклік вызваліць асуджаных па «справе 19 снежня», даць ім магчымасць атрымліваць медыцынскую і юрыдычную дапамогу, сустракацца з роднымі, а таксама дазволіць уезд у краіну незалежным экспертам, прызначаным ў рамках Маскоўскага механізму. Акрамя таго парламентарыі заклікаюць Мінск развіваць заканадаўства ў сферы СМІ ў адпаведнасці з міжнароднымі абавязальніцтвамі краіны.
На сустрэчы працоўнай групы па Беларусі парламентарыі таксама закранулі актуальныя экалагічныя пытанні. Так, Вілія Алекнайце-Абрамікене адзначыла апраўданую занепакоенасць беларусаў і літоўцаў з нагоды будаўніцтва АЭС на мяжы дзвюх краін.
«Не чакаючы вынікаў ацэнкі ўплыву на навакольнае асяроддзе і ігнаруючы свае прававыя абавязацельствы адносна кансультацый з Літвой па планаванай АЭС, Беларусь падвяргае людзей усяго рэгіёну вялікай небяспецы», — лічыць прадстаўніца Літвы.
Як перадаваў Тэлеграф, члены ПА АБСЕ неаднаразова выступалі з рэзкай крытыкай дзеянняў беларускіх уладаў у дачыненні да ўдзельнікаў акцыі пратэсту, якая прайшла ў Мінску пасля прэзідэнцкіх выбараў. Па «справе 19 снежня» ўжо асудзілі 41 чалавека, у тым ліку пяць былых кандыдатаў у прэзідэнты.
