24 чэрвеня 18 пацыентаў Рэспубліканскага туберкулёзнага шпіталя "Воўкавічы" Дзяржынскага раёна Мінскай вобласці, якія ўтрымліваюцца там на прымусовым лячэнні па рашэнні суда, абвясцілі галадоўку супраць ўмоваў утрымання. Пра гэта паведаміў адзін з пацыентаў Анатоль Шавяльчынскі.
Па словах пацыента, падставай да абвяшчэння галадоўкі сталася збіццё супрацоўнікамі міліцыі 23 чэрвеня шасці хворых. Нарад міліцыі прыбыў у сувязі з тым, што пацыенты «крыху выпілі і пасварыліся паміж сабой». Двух хворых, у тым ліку і Анатоля Шавяльчынскага, пасля збіцця закавалі ў кайданкі і змясцілі ў ізалятар, дзе іх трымалі без вады і ежы, паведамляе БелаПАН.
Як праінфармаваў Анатоль Шавяльчынскі, абураныя пацыенты напісалі ў пракуратуру Мінскай вобласці заяву, у якой запатрабавалі расследаваць інцыдэнт і праверыць ўмовы ўтрымання ў шпіталі.
У шпіталі існуе мноства неапраўданых абмежаванняў, у тым ліку на цыгарэты, цукар, гарбату, прагляд тэлевізара, выкарыстанне тэлефона, лічыць Анатоль Шавяльчынскі. На тэрыторыі лякарні няма крамы, таму пацыенты не могуць набыць нават туалетную паперу і мыла. Хворым не выдаюць пенсію, пазбаўляюць спатканняў і нават неабходнага лячэння, у выніку чаго многія пацыенты не могуць палячыць зубы ці зрабіць неабходныя аналізы. «Мы цалкам пазбаўленыя правоў і жывем тут як жывёлы», заявіў Анатоль Шавяльчынскі.
Ён таксама параўнаў ўтрыманне ў шпіталі з лагерным. Па яго словах, шпіталь акружае калючы дрот, а ахоўнікі ўзброеныя. Анатоль Шавяльчынскі таксама сцвярджае, што не рэдкія выпадкі збіцця пацыентаў.
У той жа час лекар туберкулёзнага шпіталя Надзея Цюхай лічыць, што скаргі пацыентаў «шмат у чым неабгрунтаваныя». Па яе словах, ахова ўмешваецца ў справы хворых толькі па выкліку медпрацаўнікоў. Сілу ахова ужывае толькі ў выпадках, калі існуе пагроза жыццю супрацоўнікаў або хворых, у тым ліку пры бойках.
Як патлумачыла доктарка, пацыенты маюць асабістыя рэчы, а абмежаванні на выкарыстанне некаторых прадуктаў і рэчаў патлумачыць, бо, хворым на сухоты супрацьпаказана курэнне і ўжыванне алкаголю. Па словах жа Надзеі Цюхай, цукар і цукеркі абмежаваныя, бо пацыенты робяць з іх брагу.