За паўтары тыдні змеі пад Мінскам пакусалі семярых чалавек. Пра гэта паведаміў загадчык аддзялення па лячэнні вострых атручанняў Лякарні хуткай дапамогі Андрэй Шмігельскі. «Ніхто не памёр. Кусаюць збольшага гадзюкі, у рукі і ногі», — адзначыў доктар.
Як паведаміў Андрэй Шмігельскі, найбольшая верагоднасць быць укушаным існуе пры збіранні ягад і грыбоў. «Апускаючы руку ў кусты, складана заўважыць змяю, а яна ваша дзеянне расцэньвае як агрэсію і таму кусае. Гадзюкі любяць забалочаныя і вільготныя месцы ў лесе», — заявіў медык, перадае «Комсомольская правда».
Ён удакладніў, што самыя небяспечныя ўкусы змеяў — у галаву, шыю і судзіны. Паступаючы ў кроў, яд прыводзіць да слабасці, галавакружэння, млявасці, млоснасці і ванітаў, пачашчаецца пульс і біццё сэрца.
Паводле лекараў, пры ўкусе змяі, неабходна адсмактаць яд, затым месца укусу апрацаваць антысэптыкам, накласці чыстую павязку і не рухаць пакусанай рукой або нагой. Таксама медыкі раяць піць як мага больш вадкасці і неадкладна звярнуцца па медыцынскую дапамогу.
