У чацвер, 5 траўня падчас працэсу над экс-кандыдатам у прэзідэнты Уладзімірам Някляевым, Віталём Рымашэўскім і іх даверанымі асобамі каля 16:30 у будынак Фрунзенскага суда сталіцы зайшоў мужчына. Як толькі ахоўнікі пачалі дагляд ягоных рэчаў, ён раптам упаў на падлогу і страціў прытомнасць. Супрацоўнікі суда выклікалі хуткую дапамогу, аднак дапамагчы мужчыну лекары не паспелі.
«Мужчына толькі паспеў сказаць, што ідзе на нейкі працэс», — паведамілі ахоўнікі, перадае «Народная Воля».
Выкліканая хуткая дапамога, на жаль, не змагла дапамагчы мужчыну: медыкі некалькі разоў рабілі яму электрашок, але ён так і не апрытомнеў, паведамляе выданне. Медыкі хуткай канстатавалі клінічную смерць мужчыны.
Называецца імя мужчыны — Самадзелкін Андрэй Афанасьевіч, 1956 года нараджэння.
Аднак у прыёмнай суда Фрунзенскага раёна карэспандэнту Тэлеграфа не пацвердзілі дадзеную інфармацыю. «Не, гэта не праўда», — сказалі там.
