На 70-м годзе жыцця памёр знакаміты беларускі пісьменнік, гісторык і журналіст Кастусь Тарасаў. Цела пісьменніка знайшлі ў яго ўласнай кватэры ў Мінску ў панядзелак, 22 сакавіка. Раней у красавіку 2006 года Кастусь Тарасаў перанёс інсульт. У апошнія месяцы пісьменнік друкаваў гістарычныя нарысы ў газеце «Новы час».
Знакаміты пісьменнік нарадзіўся ў сталіцы дзясятага кастрычніка 1940 года ў сям’і службоўцаў. Пасля сканчэння сярэдняй школы працаваў слесарам-зборшчыкам на Мінскім механічным заводзе. У 1965 годзе скончыў Беларускі політэхнічны інстытут, працаваў у Паўднёва-заходняй геалагічнай экспедыцыі, паведамляе прэс-цэнтр «Хартыі 97».
Пазней пісьменнік працягнуў працу ў выдавецтве «Вышэйшая школа», на кінастудыі «Беларусьфільм», часопісе «Нёман» (1977-1983), газеце «Літаратура і мастацтва», часопісе «Спадчына», газеце «Свабода», «Навіны», «Наша Свабода».
Кастусь Тарасаў друкаваўся з 1966 года і з’яўляецца аўтарам гістарычных аповесцяў пра мінулае Беларусі: «Дзень рассеяння» (пра Грунвальдскую бітву, 1980), «Пагоня на Грунвальд», рамана «Тры жыцці княгіні Рагнеды». Кастусь Тарасаў таксама з’яўляецца аўтарам складанкі «Памяць пра легенды» (першае выданне выйшла ў 1984 годзе, другое пашыранае з’явілася ў 1990 годзе).
