Палата прадстаўнікоў Нацыянальнага сходу Беларусі ратыфікавала 21 снежня ўвесь пакет дакументаў, якія фармуюць дагаворна-прававую базу Адзінай эканамічнай прасторы РБ, РФ і Казахстана. Па выніках пасяджэння Міждзяржсавета ЕўрАзЭС Аляксандр Лукашэнка паабяцаў, што Беларусь ратыфікуе ўвесь пакет пагадненняў да 1 студзеня 2011 года. Савет рэспублікі плануе ўхваліць дадзеныя законапраекты 22 снежня.
Гэтыя 18 пагадненняў беларускім дэпутатам прадставіў віцэ-прэм’ер Андрэй Кабякоў. Як распавёў намеснік кіраўніка беларускага ўрада, пасля завяршэння працэдуры ратыфікацыі гэтых пагадненняў нафта і нафтапрадукты будуць паступаць у Беларусь з Расіі бяспошлінна і без абмежаванняў аб’ёмаў, перадае БелТА.
Паводле слоў Андрэя Кабякова, у выніку доўгіх перамоваў Мінск і Масква прыйшлі да кампраміснага рашэння з нагоды размеркавання пошлінаў на нафту і нафтапрадукты, якое прадугледжвае, што мыта ад экспарту беларускай сырой нафты паступае ў бюджэт Беларусі, а пошліна ад экспарту нафтапрадуктаў — у бюджэт Расіі.
Кабякоў: Беларусь і Расія рыхтуюць новы кантракт па газе
Акрамя таго, паведаміў віцэ-прэм’ер, пасля ратыфікацыі дакументаў па АЭП «Белтрансгаз» і «Газпром» павінны падрыхтаваць ў 2011 годзе кантракт, які прадугледжвае фармаванне цэн на газ для Беларусі ў 2012-2014 гадах з улікам паэтапнага выхаду Расіі на роўнадаходныя кошты на газ з 1 студзеня 2015 года.
Прапанаванае да ратыфікацыі адпаведнае пагадненне аб правілах доступу да паслуг суб’ектаў натуральных манаполій ў сферы транспарціроўкі газу па газатранспартнай сістэме, уключаючы асновы цэнаўтварэння і тарыфнай палітыкі пачне дзейнічаць з 1 студзеня 2012 года, удакладніў Андрэй Кабякоў.
